“Реал Мадрид” бош мураббийси Хаби Алонсо ҳужумчи Килиан Мбаппенинг Испания Суперкубоги финалида “Барселона”га қарши ўйинда майдонга тушиш эҳтимоли ҳақида фикр билдирди. Бу ҳақда Мадрид клуби матбуот хизмати хабар берди.
Мутахассиснинг айтишича, франциялик юлдузнинг “Эл-Класико”да иштирок этиши эҳтимоли бор.
“Мбаппе тез орада жамоага қўшилади. Унинг ўйнашга тайёр ёки тайёр эмаслигини тиббий штаб билан биргаликда баҳолаймиз. Ҳолати анча яхшиланди, машғулотларда қатнашди ва ўзини яхши ҳис қиляпти. Унинг майдонга тушиш имконияти бошқа футболчиларникидан кам эмас”, — деди Алонсо ўйиндан кейинги матбуот анжуманида.
Маълумот учун, Килиан Мбаппе жароҳати сабаб Испания Суперкубоги ярим финалидаги “Атлетико”га қарши учрашувни ўтказиб юборган эди. Ўша баҳсда “Реал Мадрид” Федерико Вальверде ва Родригонинг голлари эвазига 2:1 ҳисобида ғалаба қозониб, финалга йўл олган. Ҳал қилувчи учрашувда “қаймоқранглилар”га “Барселона” рақиблик қилади.
Испания Суперкубоги финали 12 январга ўтар кечаси, Тошкент вақти билан 00:00 да Саудия Арабистонининг Жидда шаҳридаги “Қирол Абдулла” стадионида бўлиб ўтади.
Қайд этилишича, Килиан Мбаппе 2024 йил ёзидан буён “Қироллик клуби” шарафини ҳимоя қилиб келмоқда. У шу пайтга қадар “Реал” сафида 83 та учрашувда 73 та гол уриб, 10 та голли узатма амалга оширган. Жорий мавсумда эса барча мусобақаларда 24 ўйинда 29 та гол ва 5 та ассист қайд этган.
Футболчининг мадридликлар билан амалдаги шартномаси 2029 йил ёзигача мўлжалланган. Transfermarkt порталига кўра, Мбаппенинг бозор қиймати 200 миллион еврони ташкил этади.
