Afg‘onistonning “Tolibon” nazoratidagi Kunar viloyatida urushdan qolgan portlovchi moddalar portlashi oqibatida kamida ikki nafar mahalliy aholi vakili halok bo‘ldi. Bu haqda viloyat politsiya boshqarmasi xabar berdi.
Ma’lum qilinishicha, Nur Gul tumanining Mazar Dara qishlog‘ida urushdan qolgan artilleriya snaryadi portlashi natijasida bir nafar bola vafot etgan, yana olti kishi turli tan jarohatlari olgan. Shuningdek, mahalliy manbalar Asmar tumanida sodir bo‘lgan shunga o‘xshash hodisada bir nafar ayol halok bo‘lgani, ikki kishi esa jarohat olganini ma’lum qilgan.
Politsiya ma’lumotlariga ko‘ra, Nur Gul tumanidagi portlash 6 yanvar kuni fuqarolardan birining uyida sodir bo‘lgan. Asmar tumanida qayd etilgan portlash ham xuddi shu kuni ro‘y bergan. Jarohat olganlar shifoxonaga yotqizilib, hozirda shifokorlar nazorati ostida davolanmoqda.
Qayd etilishicha, Afg‘onistonda urushdan qolgan portlovchi qurilmalar aholi, ayniqsa bolalar hayoti uchun jiddiy xavf solib kelmoqda.
Birlashgan Millatlar Tashkilotining Bolalar jamg‘armasi (UNICEF) ma’lumotlariga ko‘ra, mamlakatda har oy kamida 55 nafar inson portlovchi moddalar portlashi qurboniga aylanadi. Ulardan 85 foizini bolalar tashkil etadi.
