Bu haqda mamlakat Sog‘liqni saqlash vazirligidagi ikki nafar yuqori lavozimli rasmiyga tayanib, Time jurnali xabar berdi.
Manbalarning aytishicha, qurbonlar soni favqulodda xizmatlar imkoniyatidan ham oshib ketgan. Xususan, jasadlar uchun mo‘ljallangan maxsus xaltalar yetishmaganligi sababli, tez yordam mashinalari o‘rniga tirkamali texnikalardan foydalanishga to‘g‘ri kelgan.
Eron rasmiylari esa 23 yanvar kuni e’lon qilgan ma’lumotlariga ko‘ra, namoyishlar oqibatida jami 3117 kishi halok bo‘lgan. Tashqi ishlar vaziri Abbos Aroqchining ta’kidlashicha, ular orasida 2427 nafar tinch aholi vakillari va xavfsizlik xodimlari, shuningdek 690 nafar “terrorchi” bor.
Time nashri keltirilgan 30 minglik raqamni mustaqil manbalar orqali tasdiqlay olmaganini qayd etgan. Biroq jurnalistlar suhbatlashgan shifokorlar va favqulodda xizmat xodimlarining hisob-kitoblari ushbu ko‘rsatkichlarga yaqin ekanligi aytiladi.
Shifokor Amir Parastaning ma’lum qilishicha, u tuzgan hisobotda harbiy shifoxona morglariga olib kelingan jasadlar hamda hisob yuritilmagan hududlardagi qurbonlar inobatga olinmagan. Uning fikricha, real qurbonlar soni e’lon qilinganidan ham yuqori bo‘lishi mumkin.
Shu bilan birga, AQShda joylashgan Human Rights Activists News Agency (HRANA) 24 yanvar holatiga ko‘ra, norozilik namoyishlari oqibatida kamida 5459 kishining o‘limini tasdiqlagan, yana 17 mingdan ortiq holat tekshirilmogda. Mamlakat bo‘ylab internet va mobil aloqa o‘chirilganligi sababli, qurbonlar sonini aniq aniqlash hozircha qiyinligi ta’kidlanmogda.
Ma’lumotlarga ko‘ra, Erondagi ommaviy norozilik namoyishlariga mamlakatdagi og‘ir iqtisodiy vaziyat sabab bo‘lgan. Rasmiy Tehron tartibsizliklarni tashkil etishda AQSh va Isroilni ayblagan. AQSh prezidenti Donald Trump Eron hukumat namoyishlarni kuch bilan bostirsa, zarba berish bilan tahdid qilgan, biroq ittifoqchilar bilan maslahatlashuvlardan so‘ng bu fikridan qaytgan.
