Бу ҳақда мамлакат Соғлиқни сақлаш вазирлигидаги икки нафар юқори лавозимли расмийга таяниб, Time журнали хабар берди.
Манбаларнинг айтишича, қурбонлар сони фавқулодда хизматлар имкониятидан ҳам ошиб кетган. Хусусан, жасадлар учун мўлжалланган махсус халталар етишмагани сабабли, тез ёрдам машиналари ўрнига тиркамали техникалардан фойдаланишга тўғри келган.
Эрон расмийлари эса 23 январь куни эълон қилган маълумотларига кўра, намойишлар оқибатида жами 3117 киши ҳалок бўлган. Ташқи ишлар вазири Аббос Ароқчининг таъкидлашича, улар орасида 2427 нафар тинч аҳоли вакиллари ва хавфсизлик ходимлари, шунингдек 690 нафар “террорчи” бор.
Time нашри келтирилган 30 минглик рақамни мустақил манбалар орқали тасдиқлай олмаганини қайд этган. Бироқ журналистлар суҳбатлашган шифокорлар ва фавқулодда хизмат ходимларининг ҳисоб-китоблари ушбу кўрсаткичларга яқин экани айтилади.
Шифокор Амир Парастанинг маълум қилишича, у тузган ҳисоботда ҳарбий шифохоналар моргларига олиб келинган жасадлар ҳамда ҳисоб юритилмаган ҳудудлардаги қурбонлар инобатга олинмаган. Унинг фикрича, реал қурбонлар сони эълон қилинганидан ҳам юқори бўлиши мумкин.
Шу билан бирга, АҚШда жойлашган Human Rights Activists News Agency (ҲРАНА) 24 январь ҳолатига кўра, норозилик намойишлари оқибатида камида 5459 кишининг ўлимини тасдиқлаган, яна 17 мингдан ортиқ ҳолат текширилмоқда. Мамлакат бўйлаб интернет ва мобил алоқа ўчирилгани сабабли, қурбонлар сонини аниқ аниқлаш ҳозирча қийинлиги таъкидланмоқда.
Маълумотларга кўра, Эрондаги оммавий норозилик намойишларига мамлакатдаги оғир иқтисодий вазият сабаб бўлган. Расмий Теҳрон тартибсизликларни ташкил этишда АҚШ ва Исроилни айблаган. АҚШ президенти Доналд Трамп Эрон ҳукумати намойишларни куч билан бостирса, зарба бериш билан таҳдид қилган, бироқ иттифоқчилар билан маслаҳатлашувлардан сўнг бу фикридан қайтган.
