Turkiya Respublikasi Prezidenti Rajap Tayyip Erdo‘g‘on Anqara shahridagi Oqsaroy qarorgohida O‘zbekiston Respublikasi Prezidenti Shavkat Mirziyoyevni rasmiy marosim bilan kutib oldi.
Oliy martabali mehmon sharafiga faxriy qorovul saf tortdi, harbiy orkestr ijrosida ikki davlat madhiyalari yangradi. Davlat rahbarlari faxriy qorovul oldidan o‘tib, rasmiy delegatsiyalar a’zolari bilan ko‘rishdi.
Ayni paytda prezidentlarning tor doira muzokaralari bo‘lib o‘tmoqda. Unda O‘zbekiston–Turkiya keng qamrovli strategik sheriklik munosabatlarini yanada rivojlantirish masalalari muhokama qilinmoqda.
