O‘zbekiston Respublikasi Prezidenti Shavkat Mirziyoyev va Turkiya Respublikasi Prezidenti Rajap Tayyip Erdo‘g‘on raisligida oliy darajadagi Strategik hamkorlik kengashining to‘rtinchi yig‘ilishi o‘tkazildi.
Tomonlar mazkur tadbir muborak Ramazon oyi hamda ikki mamakat o‘rtasida Abadiy do‘stlik va hamkorlik to‘g‘risidagi shartnoma imzolanganiga 30 yil to‘lishi arafasida bo‘lib o‘tayotganini ramziy ahamiyatga ega ekanini ta’kidladi. Siyosiy muloqot jadal rivojlanayotgani, xalqaro masalalar bo‘yicha pozitsiyalar o‘xshashligi qayd etildi.
BMT, Turk davlatlar tashkiloti, Islom hamkorlik tashkiloti, Iqtisodiy hamkorlik tashkiloti doirasida o‘zaro qo‘llab-quvvatlashni davom ettirishga kelishib olindi. Parlamentlararo aloqalar faollashgani, savdo hajmi hamda qo‘shma korxona va loyihalar soni ortib borayotgani ta’kidlandi.
Kelgusi yillarda o‘zaro tovar ayirboshlash hajmini 5 milliard dollarga etkazish vazifasi belgilandi. Shuningdek, sanoat kooperatsiyasi, hududlararo hamkorlik, qishloq xo‘jaligi, sog‘ligni saqlash, turizm, madaniyat va ta’lim sohalarida qo‘shma tashabbuslarni kengaytirishga kelishib olindi.
Yig‘ilish yakunida hukumatlarga qabul qilingan qarorlarni amalga oshirish bo‘yicha “yo‘l xaritasi”ni tasdiqlash topshirildi. Shavkat Mirziyoyev Rajap Tayyip Erdo‘g‘onni O‘zbekistonga rasmiy tashrif bilan kelishga taklif qildi.
