Jahon sog‘liqni saqlash tashkiloti (JSST) Bangladesh shimolida Nipah virusi bilan kasallangan ayol vafot etganini tasdiqladi. Ma’lum qilinishicha, bemorda kasallikning dastlabki alomatlari 21 yanvar kuni kuzatilgan. Unda isitma, bosh og‘rig‘i va tutqanoq hurujlari qayd etilgan, keyinchalik esa orientatsiyani yo‘qotish hamda kuchli so‘lak ajralishi kuzatilgan. Ayol bir hafta o‘tib vafot etgan, tashxis esa o‘limidan keyin laborator tekshiruvlar orqali tasdiqlangan. Bu haqda zamon.uz yozmoqda.
Sog‘liqni saqlash mutaxassislari bemor bilan aloqada bo‘lgan 35 nafar shaxs kuzatuv ostiga olinganini ma’lum qildi. Ularning barchasida o‘tkazilgan testlar manfiy natija ko‘rsatgan va hozircha yangi kasallanish holatlari aniqdanmagan.
JSST ma’lumotlariga ko‘ra, Nipah virusi yuqori xavfli infektsiyalar qatoriga kiradi. Kasallikdan o‘lim darajasi turli holatlarda 40 foizdan 75 foizgacha etishi mumkin. Virus odatda ko‘rshapalaklar orqali yuqadi, ayrim holatlarda esa odamdan odamga yuqishi ehtimoli mavjud.
Mutaxassislar infektsiyadan himoyalanish uchun meva va oziq-ovqat mahsulotlarini yaxshilab yuvish, yovvoyi hayvonlar bilan bevosita aloqa qilmaslik, shuningdek, himoya vositalaridan foydalanishni tavsiya etmoqda. Hozircha Nipah virusiga qarshi tasdiqlangan vaktsina yoki maxsus davolash usuli mavjud emas.
