Turkiya Superligasining 21-turi doirasida “Istanbul Bashakshehir” safarda “Eyupspor”ni 2:1 hisobida mag‘lub etdi. Uchrashuvda O‘zbekiston milliy terma jamoasi futbolchilari Eldor Shomurodov va Abbosbek Fayzullayev asosiy tarkibda maydonga tushdi.
Bellashuvda Shomurodov jamoasining ilk goliga mualliflik qilgan bo‘lsa, Fayzullayev ikkinchi golga assist berdi. “Sofascore” portali Eldorning o‘yindagi harakatlarini 8 ball bilan baholadi. Abbosbek Fayzullayev esa 7,7 ballga loiq ko‘rildi.
Ayni paytda Eldor Shomurodov Superligada 15 ta gol urib, “Trabzonspor” hujumchisi Pol Onuachu bilan birga musobaqaning eng yaxshi to‘purari bo‘lib turibdi. 12 ta gol bilan “Fenerbahche” forvardi Taliska uchinchi o‘rinda bormoqda.
Ma’lumot uchun, 18-tur yakunlariga ko‘ra, Turkiya Superligasida “Galatasaroy” 52 ochko bilan peshqadamlik qilmogda. “Fenerbahche” 49 ochko bilan ikkinchi, “Trabzonspor” 45 ochko bilan uchinchi o‘rinda. “Istanbul Bashakshehir” esa 33 ochko bilan 6-pog‘onani egallab turibdi.
