"Oltin to‘p"ning sakkiz karra sohibi Lionel Messi Argentina milliy jamoasidagi faoliyatini yakunlashi mumkin. Biroq futbolchining o‘zi bu borada hozircha rasmiy bayonot bermagan.
JCH-2026 finalida Ispaniyaga 0:1 hisobida mag‘lub bo‘lganidan so‘ng 39 yoshli Messi maydonda uzoq vaqt qolib ketdi va Argentina muxlislari tomon qarab yig‘ladi. Bu holat ko‘pchilik tomonidan uning terma jamoadagi faoliyatiga ehtimoliy vidosi sifatida qabul qilindi.
Ayrim xabarlarga ko‘ra, Messi finaldan keyin kiyinish xonasida jamoadoshlari bilan suhbatlashib, Ispaniyaga qarshi o‘yin uning Argentina terma jamoasidagi so‘nggi uchrashuvi bo‘lganini aytgan. Biroq bu ma’lumot hozircha rasmiy manbalar tomonidan tasdiqlanmagan.
Argentinalik futbolchi finaldan keyin ijtimoiy tarmoqdagi sahifasida o‘z his-tuyg‘ulari bilan o‘rtoqlashdi. U mag‘lubiyat og‘rig‘i kuchli ekanini, ammo jamoa bilan erishilgan natijalardan faxrlanishini aytdi. Shuningdek, Ispaniyani jahon chempionligi bilan tabrikladi.
Messi uchun bu milliy jamoa bilan xayrlashuv bo‘lsa, u 2016 yildagi qarorini eslatadi. O‘shanda Argentina Amerika kubogi finalida Chiliga mag‘lub bo‘lganidan so‘ng futbolchi terma jamoadagi faoliyatini yakunlashini ma’lum qilgan edi. Biroq bir necha oy o‘tib, u bu qaroridan qaytgan.
Shundan keyin Messi Argentina bilan 2021 va 2024 yillarda Amerika kubogi, 2022 yilda esa Jahon chempionatida g‘olib chiqdi.
JCH-2026da Messi 8 ta o‘yinda maydonga tushib, 8 ta gol urdi va 4 ta gol uzatmani amalga oshirdi.
Ayni paytda uning Argentina milliy jamoasidagi kelajagi ochiq qolmoqda. Messi terma jamoa bilan xayrlashgani haqida hozircha rasmiy ravishda e’lon qilmagan.
