Bangladeshda daraxt-odam yashaydi(Foto)

Bangladeshda yashovchi Abul Bajandar kam uchraydigan kasallikdan aziyat chekadi. Tug`ma nuqsonlar tufayli uning organizmi inson papillomasi virusiga o`ta darajada sezuvchan bo`lib qolgan. Bu esa bemorning qo`l va oyoqlarida daraxt shoxlarini eslatuvchi o`simtalar o`sib chiqishiga olib kelmoqda. Bunday kasallar tibbiyotda daraxt-odamlar deb ataladi. 

Abulda kasallikning ilk belgilari 10 yosh paytida paydo bo`lgan. Sekin-asta uning ahvoli og`irlasha boshlagan. Riksha haydagan Abul ishini tashlashga majbur bo`ldi. bora-bora u qo`lida oddiy buyumlarni, hatto qoshiqni ham ushlab turolmaydigan bo`lib qoldi. 

Abulni ko`zdan kechirgan shifokorlar uni davolash uchun bir nechta jarrohlik amaliyotini o`tkazish zarurligini ma`lum qilishdi. Ilk operasiyani u 2016 yilning mart oyida boshdan kechirdi. Abul shifoxonada bir yilcha qolib ketdi. undagi o`simtalarni olib tashlash uchun hammasi bo`lib 16 ta operasiya o`tkazildi.

Shifokorlarning aytishicha, Abuldan olib tashlangan o`simtalarning umumiy og`irligi 5 kilogramni tashkil etadi. Ular o`simtalar yana o`sib chiqmasligiga umid qilmoqda. Daraxt-odamlar haqidagi ma`lumotlar tibbiy kitoblarda ilk marotaba 1920 yilda qayd etilgan. Bu kasallikka chalingan  mashhur inson sifatida Indoneziya fuqarosi Dede Kosvara tilga olinadi. U qo`li va oyoqlaridagi o`simtalarni oldirish uchun bir necha marotaba jarrohlik stoliga yotqizilgan. Dede 2016 yilning yanvarida organizm etishmovchiligidan vafot etgan.