Бангладешда яшовчи Абул Бажандар кам учрайдиган касалликдан азият чекади. Туғма нуқсонлар туфайли унинг организми инсон папилломаси вирусига ўта даражада сезувчан бўлиб қолган. Бу эса беморнинг қўл ва оёқларида дарахт шохларини эслатувчи ўсимталар ўсиб чиқишига олиб келмоқда. Бундай касаллар тиббиётда дарахт-одамлар деб аталади.
Абулда касалликнинг илк белгилари 10 ёш пайтида пайдо бўлган. Секин-аста унинг аҳволи оғирлаша бошлаган. Рикша ҳайдаган Абул ишини ташлашга мажбур бўлди. бора-бора у қўлида оддий буюмларни, ҳатто қошиқни ҳам ушлаб туролмайдиган бўлиб қолди.
Абулни кўздан кечирган шифокорлар уни даволаш учун бир нечта жарроҳлик амалиётини ўтказиш зарурлигини маълум қилишди. Илк операцияни у 2016 йилнинг март ойида бошдан кечирди. Абул шифохонада бир йилча қолиб кетди. ундаги ўсимталарни олиб ташлаш учун ҳаммаси бўлиб 16 та операция ўтказилди.
Шифокорларнинг айтишича, Абулдан олиб ташланган ўсимталарнинг умумий оғирлиги 5 килограмни ташкил этади. Улар ўсимталар яна ўсиб чиқмаслигига умид қилмоқда. Дарахт-одамлар ҳақидаги маълумотлар тиббий китобларда илк маротаба 1920 йилда қайд этилган. Бу касалликка чалинган машҳур инсон сифатида Индонезия фуқароси Деде Косвара тилга олинади. У қўли ва оёқларидаги ўсимталарни олдириш учун бир неча маротаба жарроҳлик столига ётқизилган. Деде 2016 йилнинг январида организм етишмовчилигидан вафот этган.
