​Toshkent shahrida Maxtumquli nomidagi ko`cha va unga bag`ishlangan me`moriy yodgorlik ochildi

Toshkent shahrida ulug` turkman shoiri va mutafakkiri Maxtumquli nomidagi ko`cha va unga bag`ishlangan me`moriy yodgorlik ochildi, deb xabar beradi O`zA.

18 may kuni poytaxtimizda bo`lib o`tgan ochilish marosimida mamlakatimizdagi davlat va jamoat tashkilotlari, turli milliy madaniyat markazlari vakillari, shoir va yozuvchilar, adabiyotshunoslar, san`atkorlar, talabalar ishtirok etdi.

Prezidentimiz Shavkat Mirziyoevning shu yil 6-7 mart kunlari Turkmanistonga davlat tashrifi O`zbekiston tashqi siyosatda yaxshi qo`shnichilik munosabatlariga alohida ahamiyat qaratayotganining yaqqol isboti bo`ldi.

Mazkur tashrif davomida Amudaryoda qurilgan Turkmanobod-Farab avtomobil va temir yo`l ko`priklari, ushbu shaharda Birinchi Prezidentimiz Islom Karimov nomidagi markaziy ko`cha va yodgorlik majmuasi ochilgan edi.

Tashrif arafasida poytaxtimizdagi eng ko`rkam va go`zal ko`chalardan biriga Maxtumquli nomi berildi. Shavkat Mirziyoev Turkmanistonda Gurbanguli Berdimuhamedovga Maxtumqulining o`zbek tilida chop etilgan “Elingga baxsh ayla” kitobini sovg`a qildi. Bularning barchasi mamlakatlarimiz o`rtasidagi hamkorlik yaxshi qo`shnichilik va qardoshlik tamoyillari asosida rivojlanib borayotganini yorqin namoyon etdi.

Prezidentimiz Shavkat Mirziyoev Turkmaniston Prezidenti Gurbanguli Berdimuhamedovning taklifiga binoan shu yilning 19-20 may kunlari amaliy tashrif bilan Turkmanistonda bo`lishi mazkur oliy darajadagi muloqotning mantiqiy davomidir. Ushbu tashrif oldidan Toshkent shahrida atoqli turkman shoiri va mutafakkiri Maxtumquli nomidagi ko`cha va unga bag`ishlangan me`moriy yodgorlik ochilishi O`zbekistonning qardosh va birodar turkman xalqiga yuksak hurmat va e`tiborining yana bir yorqin ifodasi bo`ldi.

Monumental yodgorlik muallifi – xorazmlik yosh haykaltarosh Jasvand Annazarov.

Maxtumquli yodgorligi poyi gullarga burkandi.