​Qilichbek Madaliev dunyoning turli erlarida qo`li qonga botgan o`zbeklarga murojaat qildi (Video)

Terrorchilik harakatlarining ijrochilari qatorida millatimizga mansub kimsalar

Bugun dunyoning qator mamlakatlarida sodir bo`layotgan mudhish voqealar, ularning ba`zilarida o`zbek millatiga mansub kishilarning ishtiroki barchani havotirga solmoqda. Ana shunday bir vaqtda xonanda Qilichbek Madaliev tomonidan kuylangan mazkur tarona tinglovchilarning ayni yuragiga etib borishi tabiiy.

“O`zbek emas…” — ushbu muammoni aynan ushbu tarona orqali kuyga solishga qaror qildi.

Qo`shiq Qilichbek Madalievning shunday so`zlari bilan boshlanadi:

“So`nggi vaqtlarda dunyoning turli joylarida sodir etilayotgan qo`poruvchilik ijrochilari o`zbek millatiga mansub, degan xabarlar yuragimni vayron qilmoqda. Gapirmangiz, eshitmayman, yolg`on bari, qo`li qonga botgan bo`lsa o`zbek emas...”

Ha, darhaqiqat azal-azaldan bag`ri keng sifatida e`tirof etib kelingan o`zbek xalqi tomonidan bunday razilliklarning amalga oshirilishini hech bir sabab va bahonalar bilan oqlab bo`lmaydi.

Prezidentimiz Shavkat Mirziyoev "Ijtimoiy barqarorlikni ta`minlash, muqaddas dinimizning sofligini asrash – davr talabi" mavzusidagi anjumanda so`zlagan nutqida ushbu mavzuga to`xtalar ekan quyidagi fikrlarni bildirib o`tdi:

“Keyingi paytda turli mamlakatlarda sodir etilayotgan terrorchilik harakatlarining ijrochilari qatorida millatimizga mansub kimsalar ham borligi xalqimizda afsus va nadomat uyg`otmoqda.

Tinchlik va osoyishtalikni, insoniylikni hamma narsadan ustun qo`yadigan xalqimiz bunday shaxslarni, ularning qilmishlarini keskin qoralaydi. Ularni o`zbek degan nomga nomunosib deb hisoblaydi.

Hozirgi vaqtda yoshlar, ayniqsa, chet elda ishlab, halol mehnat bilan daromad topaman, deb yurgan fuqarolarimiz terrorizm va ekstremizm changaliga tushib qolmasligi uchun biz barcha choralarni ko`ryapmiz”.

Xonanda tomonidan kuylangan “O`zbek emas...” taronasi ham bunday manfur yo`lga kirib qolgan va jar yoqasida turgan yurtdoshlarimizni qaytarishga oz bo`lsada xizmat qilsa ajab emas. Zero, san`at inson qalbiga etib boradigan eng kuchli qurollardan biri sanaladi.

Qo`shiq so`zlari O`lmasbek Samarqandiy, musiqasi Abzal Xusanov qalamiga mansu. Qo`shiqqa video Ilhom Yusuf tomonidan suratga olingan.

Quyida qo`shiq tinglab, o`zingiz baho bering!