Oltinko`l tumanida yashovchi Ya.F. 2017 yil 11 avgust kuni qo`l telefonida “Odnoklassniki” ijtimoiy tarmog`i orqali o`zini “Parpiev Bexruz” deb atagan shaxs bilan tanishib qoldi. Oradan 11 kun o`tgach “Bexruz” bilan Andijon shahri, Bobur maydoni yonida uchrashishdi.
Kutilmaganda “Bexruz” Ya.F ning “Samsung” rusumli qo`l telefonini olib qo`yib, o`zini xukukni muxofaza kiluvchi idora xodimi ekanligini bildirdi. Ya.F.ning telefonidan 32 ta pornografik mazmundagi video tasvirlar chiqqanligini aytib, ushbu video tasvirlar uchun qonuniy chora ko`rishlik bilan qo`rqitadi. Noiloj qolgan Ya.F o`ziga nisbatan qonuniy chora ko`rilmasligi evaziga 100 AQSh dollar beradi.
Oradan bir necha kun o`tib “Bexruz” Ya.F.ga qo`ng`iroq qilib, 2017 yil 26 avgust kuniga qadar yana 200 AQSh dollari va 50.000 so`m miqdorida pulni talab qiladi. Agarda ushbu pullarni bermasa, mahallasiga borib oilasi va tanishlariga sharmanda qilib, qamatib yuborish bilan qo`rqitadi.
Uning arizasi yuzasidan 26 avgust kuni Andijon viloyati IIB xodimlari tomonidan o`tkazilgan tezkor tadbir davomida Andijon shahri, Amir Temur shohko`chasida joylashgan “Avtoshohbekat”da “Bexruz” Ya.F.dan kimyoviy ishlov berilgan 200 AQSh dollari va 50.000 so`m miqdoridagi pullarni olgan vaqtida ushlandi.
Olib borilgan surishtiruv xarakatlari davomida “Parpiev Bexruz” aslida, Andijon tumani, Serfayz ko`chasida yashovchi 1989 yilda tug`ilgan G.I. ekanligi aniqlandi.
Ushbu holat yuzasidan Andijon viloyati IIB tergov boshqarmasi tomonidan O`zbekiston Respublikasi Jinoyat kodeksining 165-moddasi 2-qismi bilan jinoyat ishi qo`zg`atildi.
