Tahririyatga kelgan xatlarni saralay turib, to`qqiz yoshli Bahrom degan bola nomidan kelgan maktub e`tiborimni tortdi. Bizga yosh bolalar xat yozmagani uchun qiziqib o`qiy boshladim: «...Onajon, bilaman, agar ilojingiz bo`lganda, albatta, kelib meni olib ketardingiz. Tarbiyachimiz Farida opam aytdi, siz ham menga o`xshab yura olmas ekansiz. Onajon, kela olmasangiz, hech bo`lmasa, xat yozib turing, iltimos. Sizdan bittagina xat olsam, dunyoda mendan baxtli odam bo`lmasdi...» Hayron bo`lib, konvertdagi manzilni qayta o`qidim. Pochtachilar adashmagandi, konvert ustiga tahririyatimiz manzili yozilgandi. Shundan keyin maktub yo`llangan manzilga qaradim: «Toshkent shahri, -... raqamli imkoniyati cheklangan bolalar maktab-internati».
Kun bo`yi xayolimdan shu maktub ketmadi. Nazarimda ko`zlariga mung cho`kkan bolakay maktub javobini intiqib kutib o`tirgandek bo`laverdi. Ko`nglimdagi bu g`ashlikni tarqatmasam ishlay olmasligimni bilib, ma`lumotlar markazidan o`sha maktabning telefon raqamlarini olib qo`ng`iroq qildim.
Men vaziyatni tushuntirdim:
— Tahririyatdan qo`ng`iroq qilayapman, to`qqiz yoshli o`quvchingizdan bizga maktub kelgan. Lekin taxminimcha xatni adashib jo`natgan shekilli, chunki maktub onasiga yozilgan...
Go`shakdagi qiz bir muddat yonidagilar bilan alalanarsalarni gaplashib oldi.
Titrab ketdim. Keyin o`sha xatni adashtirib yuborgan tarbiyachining telefon raqamlarini so`radim. Kotiba qiz xodimlarining raqamlarini bera olmasligini aytgach, o`zimning raqamlarimni qoldirdim va menga qo`ng`iroq qilsin, deb iltimos qildim.
Go`shakni qo`ygach, ko`nglimdagi g`ashlik yanada kuchaydi. Sho`rlik bola, onamga deb maktublar yozib, qachon javobi kelarkan deya kutib o`tirgandir. O`zim tanimaydigan Bahrom butkul xayolimni egalladi. Uning onasini topishda yordam bergim keldi.
Tushdan keyin begona raqamlardan qo`ng`iroq bo`ldi. O`zini Farida deb tanishtirgan qiz Bahromni tarbiyachisi ekanini aytdi. Undan bola haqida so`raganimda, «Telefonda aytiladigan gap emas, ertaga keling, direktorimiz maqola tayyorlashga ham ruxsat bergan, bir yo`la Bahromni ham ko`rib ketasiz», dedi.
Ertasi kuni bordim. Bahromni yoniga meni kiritishmadi. Tuni bilan harorati oshgani, immuniteti pastligi sabab begonalar yoniga kirishi mumkin emas deyishdi. Derazadan ko`rdim. Katta-katta quralay ko`zlarini shiftga tikib yotgan bolakay nari borsa besh-olti yoshga o`xshardi. Ustiga yopib qo`yilgan adyolchasi ostida xuddi hech kim yo`qdek edi. Tomog`imga yig`i tiqildi.
Maktabdan qaytguncha yig`lab keldim. Uyga qaytgach, o`ylay-o`ylay bir qarorga keldim.
Oradan uch kun o`tib, Farida menga yana qo`ng`iroq qildi.
Farida nima gapligini tushundi.
«Bahromjon, ko`zimning oqu-qorasi, senga shu paytgacha xat yoza olmaganim uchun meni kechir, o`g`lim! Shu yillar davomida faqat sendan kelgan maktub sabab hayotman... Seni ko`rgani bora olmaganim uchun meni kechir, bolam, men ham xuddi sen kabi xastaman. Lekin yuragim faqat sen bilan! Asosiysi shu emasmi? Bir-birimizni ko`ra olmasak-da, borligimizni bilamiz. Endi senga tez-tez xat yozib turaman bolajonim. Seni jonidan ortiq ko`ruvchi onang...»
Farida xatni ovozi titrab o`qib berarkan, Bahromning zaif tanasiga jon qaytgandek bo`ldi. Uning quralay ko`zlari yoshlandi, keyin lablari titray boshladi.
«Onajon, bir kun sizdan xat kelishini bilardim, yuragim sezgandi. Tushlarimdan bilganman meni juda yaxshi ko`rishingizni. Meni ko`rgani kela olmasangiz ham mayli, onajon. Sog`-omon bo`lsangiz bo`ldi. Sizni juda sog`indim. Iltimos, endi tez-tez xat yozib turing. Farida opam o`qib beradi. Hozircha o`zim sizga yoza olmayman, biroz tobim yo`q. Lekin siz xavotir olmang, tezda yana o`zim yozadigan bo`laman...»
Bahromdan kelgan xatni yig`lab-yig`lab o`qidim. Farida bilan qo`ng`iroqlashib, uning ahvoli, nimalarga qiziqishini so`rab oldim.
«Bahromjon, tarbiyaching futbol tomosha qilishni yaxshi ko`rishingni aytdi, men ham yaxshi ko`raman. Men yotgan shifoxonada bizga futbol ko`rishga ruxsat berishadi. Istasang, senga barcha yangilkilarni etkazib turaman. Tarbiyaching aytishicha, tezroq tuzalsang, sen bilan qo`ng`iroqqilishimga ruxsat berisharkan...»
Bahrom xuddi nomozshomgul tongda bosh ko`tarib, chiroy ochgani kabi kundan-kunga hayotga qayta boshladi.
Do`xtirlar aytgan bir hafta ham o`tdi. Bir oy davomida u bilan yozishib turdik. Bahrom bilan mening o`rtamda vositachi bo`lgan Farida bir kuni kechqurun qo`ng`iroq qilib, Bahrom bilan gaplashishingiz mumkin dedi. Qilayotgan ishim to`g`ri-noto`g`riligini bilolmay qo`rquv bosib, Bahromning ovozini kuta boshladim.
— Endi oying bilan gaplashishing mumkin Bahromjon.
Go`shakning narigi tomonida Bahromning titragan ovozi eshitildi: — O-oyi...
Yuragim larzaga keldi.
Bolani noxush xayollardan chalg`itish uchun mavzuni burgim keldi.
— Endi, tez-tez gaplashib turamiz, bolam. Kecha futbol berdi. Ronaldu 5 ta gol urdi!
Bahrom bilan anchagacha gaplashib o`tirdim. U juda quvnoq, hayotsevar bolakay edi. Kechqurun Farida qo`ng`iroq qildi: — Ahvoli ancha yaxshi, qo`lini ham biroz qimirlatayapti. Siz va`da qilgan sport formasini kiyib, oynaga qarashni orzu qilib, ichiga sig`mayapti.
— Ertagayoq olib borib beraman.
Ertasiga ishim ko`payib ketdi, lekin va`damni unutmadim va ishxonadagi xodimlardan biriga pul berib bozorga yugurtirdim. Sovg`ani o`zim olib borib Bahromning ko`zidagi quvonchni derazadan bo`lsa-da, ko`rib kelmoqchi edim. Lekin yumushlardan ortmadim. Sovg`ani shogirdlarimdan biridan berib yubordim.
Endi Bahromdan quvonch to`la xat kuta boshladim. O`zim bilmagan holda uning xayoli bilan yashardim. Bahrom uchun «Real» o`yinlarini tomosha qilaman, o`zim Messining fanati bo`lsam-da, Bahromga Ronalduni maqtayman.
Bahromni taniganimga olti hafta bo`lgan kuni Farida qo`ng`iroq qildi:
— Opa, Bahromjon... — dedi u yig`lamsirab.
Sovuq xabarni ko`nglim sezib, yuragim uvishdi.
— U sovg`angizdan rosa xursand bo`ldi, hatto tushlikni ham boshqa bolalar bilan birga qila boshladi. Formani kiyib, hammaning havasini keltirib, oyijonim sovg`a qildi, deb boshi osmonga etdi. Bir haftadan buyon egnidan formani echmaydi, hatto koptokni ham quchoqlab yotadi.
Ko`zimdan quyilib kelayotgan yoshlarni to`xtata olmadim.
— Oh, o`zimning nomozshomgulim...
Yuragim siqildi, «Hali yashasa, orzularini amalga oshirsa bo`lardi-ku, u o`lishni emas yashashni istgandi-ku» degan xayollar ko`nglimni g`ash qildi... Unga etarlicha yordam bera olmadimmikan degan o`y ko`nglimni kemira boshladi
Dilfuza SOBIROVA