Toshkent viloyatining Bekobod tumanida yosh qizchalarning ziraklarini echib olib, talonchilik jinoyatini sodir etgan ayol ichki ishlar organlari xodimlarining tezkor harakatlari natijasida fosh etilib qo`lga olindi. Bu haqda Toshkent viloyati IIB matbuot xizmati xabar bermoqda.
Dastlabki tergov harakatlari davomida to`plangan hujjatlarga ko`ra, 1993 yilda Bekobod tumanida tug`ilgan I.U jamiyatda ijtimoiy foydali mehnat turi bilan shug`ullanmasdan, talonchilik, ya`ni o`zganing mulkini ochiqdan-ochiq talon-taroj qilish jinoyatini qasddan sodir etgan.
Jumladan, 2017 yil 24 oktyabr kuni uy bekasi U.Aning, 29 oktyabr kuni uy bekasi Z.Mning qo`l telefonlarini foydalanish bahonasida olib qochib ketib, ushbu telefon apparatlarini fuqaro D.Xga o`g`irlanganligini ma`lum qilmasdan sotib pullarini o`zining ehtiyojlari uchun ishlatib yuborgan.
Bundan tashqari, I.U 2017 yil 31 oktyabr kuni Bekobod tumani 13-sonli umumiy ta`lim maktabining 5-sinfida ta`lim oluvchi 2007 yilda tug`ilgan S.Aning quloqlarida bo`lgan tilla ziraklardan, uning chap qulog`idagi bir dona tilla zirakni, shu kuni soat taxminan 12:30 da Bekobod shahrida ko`p qavatli uyning oldidagi bolalar maydonchasida o`tirgan 2001 yilda tug`ilgan K.Tning quloqlarida bo`lgan bir juft tilla zirakni, 1 noyabr kuni soat taxminan 09:10 da Bekobod tumani Zafar qo`rg`onida joylashgan 55-sonli maktab binosining oldida, shu maktabning 3-sinfida o`quvchisi, 2008 yilda tug`ilgan M.Qning tilla ziragini ochiqdan-ochiq talon-taroj qilgan, tilla ziraklarni sotib, ushbu pullarni ham o`zining ehtiyojlari uchun ishlatib yuborgan.
Ushbu jinoyatni sodir etganligi uchun I.U Jinoyat Kodeksining tegishli moddasiga ko`ra, javobgarlikka tortildi.