Inson qalbini ko`rgan odam bormi?
«Insonning qalbi bor, ammo u qaerda, rangi qanday, qattiqmi yoki yumshoqmi» -degan savollarni ko`pchilik o`ylab ko`rmagan bo`lishi mumkin.
Qalb – mehrning makoni, ishq uyi, sevgi jilolanadigan maskandir. Xuddi ichingizda mehr solish uchun idish bordek.
Qalbingizni his qiling-chi? Mehr idishingizni ichida nima bor? U to`lami?
Uning ichida mehr, ishq, sevgi, yaxshi ko`rish, ishonch bormi?
Biz hayotda bu so`zlarni juda ko`p ishlatamiz.
“Men mushuklarni yomon ko`raman” yoki
“men qushlar sayrashini juda yaxshi ko`raman”.
“Men o`zimni yaxshi ko`rishni bilmayman” deyishingiz mumkin.
Erkak xiyonat qilib, xiyonatni oqlash uchun “sevgi” deb atasa, ona farzandini urib, “yaxshi ko`rganim uchun, tarbiyalash uchun urdim, nima qilay, o`zimniyam jonim og`riydi” desa.
Bu sevgini qanday tushunish mumkin?!
Er ichib kelib, kun bo`yi boshi og`rib yotsa, xotin erni yaxshi ko`rganidan yana bir piyola zahri qotildan quyib bersa... Sevgi yo`lidami bu?
Har bir inson sevishga va sevilishga ichki ehtiyoj sezadi.
Bu ehtiyoj qondirilmagunicha insonning qalb kosasi bo`shligicha qolaveradi.
Inson ehtiyojni qondirish yo`lida o`zini to`xtata olmaydi.
Qorningiz ochganida qattiq nonni ko`zingizga surib eganingizni eslang.
Bir qultum suv ichgingiz kelib chanqaganingizni eslang.
Shu kabi qalbning qorni ochadi, chanqaydi, liboslarini kiyib zavqlangisi keladi.
Qalb kosasi mehrga to`lmagan insonni tanib olish oson.
Bu inson ko`p kasal bo`ladi, ko`p gapirgisi kelmaydi, hech narsa yoqmaydi, o`zgalar dilini og`ritadi.
Qattiqqo`llik, mehrsizlik, alamzadalik uning yuzidan bilinadi.
Ovozidagi bo`g`iqlik hayron qoldirishi mumkin.
Ba`zan zoriqish bilan insonlarga boqadi.
Ba`zan tilanchilardek, kimgadir suyanish uchun elka qidiradi.
Mehr etmasligiga hammani ayblaydi... faqat o`zini emas!!!
Mehrga tashna inson hech qachon qancha mehr bersa o`shancha mehrga qonishini anglamaydi.
Manba: Hmdoyat sari, ilmiy, ma`rifiy va ijodiy kanal.