Singapur metropoliteni rahbariyati poezdlarning avtomatik boshqaruvi tizimlaridan voz kechmoqchi. The Straits Times gazetasining xabar berishicha, bunga harakatlanishda yuzaga kelayotgan uzilishlar sabab bo`lgan. Metropoliten matbuot kotibi Temmi Tanning so`zlariga qaraganda, boshida haydovchisiz poezdlar yo`nalishida tig`iz paytlarda faqat bitta operator kuzatib borishi belgilangan bo`lib, bu barcha poezdlarda yo`lga qo`yilmagandi.
— Endi qabul qilingan qarorga binoan, metropolitenning ish vaqti davomida har bir poezdda bittadan mashinist bo`ladi, – deb qo`shimcha qildi Tan. — Operator-mashinistlar poezdlarda faqat yo`lovchilarga dalda bo`lish uchungina emas, balki turli hodisalarda tezkor choralarni qo`llash uchun ham zarur bo`ladi.
Eslatib o`tamiz, Singapurda 2003 yilda dunyoda birinchi marotaba haydovchisiz poezdlarda harakatlanuvchi metropoliten liniyasi ishga tushgan edi. Shahar–davlatning metropoliteni 200 kilometr masofada xizmat ko`rsatadi. Bu transport xizmatidan har kuni 2 million kishi foydalanadi.
