16 aprel kuni Evropa Ittifoqining 28 davlati Tashqi ishlar vazirlari, Lyuksemburgda Suriyada amalga oshirilgan raketa hujumlari muhokamasiga bag`ishlangan yig`inda ishtirok etadi. TASSning xabar berishicha, bu haqida Belgiya tashqi ishlar vaziri Dide Reynders shanba kuni ma`lum qilgan.
“Evropa Ittifoqi Tashqi ishlar vazirlari dushanba kuni bo`lib o`tadigan Kengash yig`ilishida vaziyat yuzasidan maslahatlashib olish imkoniga ega bo`ladi”, – deydi u.
Mudofaa vazirligi ma`lumotiga ko`ra, Suriya harbiy va fuqarolik infratuzilmalariga qaratilgan davomiy raketa hujumlari mahalliy vaqt bilan soat 03:42 dan 05:10 gacha amalga oshirilgan. AQSh, Buyuk Britaniya va Fransiya havo kuchlari tomonidan yo`llangan zarbalar samolyotlar va kemalardan yo`naltirilgan. Ittifoqchilar 100dan ortiq qanotli va “havo-er” raketalarini uchirishgan. (O`tgan yili Suriyaning Shayrat aerodromi hududiga 59 ta raketa yo`naltirilgandi)
Avvalroq, Vashington, London va Parij, hujum Suriyaning Duma shahrida kimyoviy qurol qo`llanilganiga qarshi javob bo`ldi, deb bayonot bergan. Ba`zi ma`lumotlarga ko`ra, taxminan 10 ta ob`ekt hujumga uchragan, biroq Suriyaning SANA axborot agentligi ushbu ma`lumotni tasdiqlamadi.
Dumada 7 aprel kuni sodir bo`lgan voqeadan so`ng Rossiyaning Nizolashayotgan tomonlarni murosaga keltirish markazi vakillari 9 aprel kuni voqea joyida bo`lib, tekshiruv o`tkazgan va kimyoviy qurol qo`llanilganiga dalil topmaganini ma`lum qilgandi. Shanba kuni ushbu hududda kimyoviy qurollarni ta`qiqlash tashkiloti ekspertlari ish boshladi.
Ayni vaqtda Fransiya rasmiylari tomonidan esa mamlakat maxsus xizmatlarining Dumada kimyoviy qurollar qo`llanilganini tasdiqlovchi maxfiy ma`lumotlari yozilgan hisoboti e`lon qilindi.
