Nogironligi bo`lgan shaxslarni tibbiy-ijtimoiy reabilitasiya qilish samaradorligi oshirilmoqda.
Prezidentning 2018 yil 20 iyunda “Protez-ortopediya buyumlari va reabilitasiya texnik vositalarini ishlab chiqarishni rivojlantirish hamda tibbiy-ijtimoiy muassasalarning moddiy-texnika bazasini yanada kuchaytirish chora-tadbirlari to`g`risida”gi qarorida ushbu jihatlar nazarda tutilgan.
Qarorga muvofiq:
- nogironligi bo`lgan shaxslarni tibbiy-ijtimoiy reabilitasiya qilish samaradorligi oshiriladi, Muruvvat va Saxovat internat uylari tizimi yanada rivojlantiriladi;
- tibbiy-ijtimoiy muassasalarning aholining ijtimoiy ehtiyojmand toifalarini qabul qilish bo`yicha imkoniyatlari kengaytiriladi;
- ishlab chiqarilayotgan protez-ortopediya buyumlari va reabilitasiya texnik vositalarining sifati yaxshilanadi va ularning turlari kengaytiriladi.
Qoraqalpog`iston Respublikasi Vazirlar Kengashi, viloyatlar va Toshkent shahar hokimliklariga bir oy muddatda 2018-2022 yillarda aholining ijtimoiy ehtiyojmand toifalariga tibbiy-ijtimoiy yordam ko`rsatishni yanada chuqurlashtirish va kengaytirish bo`yicha hududiy kompleks chora-tadbirlarni ishlab chiqish va tasdiqlash topshirildi.
Shuningdek, 2019/2020 o`quv yilidan boshlab o`rta maxsus, kasb-hunar va oliy ma`lumotli protezchi mutaxassislarni tayyorlanadi.
Moliya vazirligiga tibbiy-ijtimoiy muassasalarni qurish va ta`mirlashni moliyalashtirishning amaldagi tartibini tanqidiy qayta ko`rib chiqish hamda mazkur sohada ortiqcha tartib-taomillarni chiqarib tashlash, ishlarning shaffofligini ta`minlash va sifatini yanada oshirish bo`yicha aniq takliflarni kiritish vazifasi yuklatildi.
