Ijtimoiy tarmoqlarda «Matiz» rusumli avtomobil haydovchisi jamoat transporti uchun mo`ljallangan joyni o`z avtomashinasi bilan to`sib qo`yganligi aks etgan video tarqaldi.
Haydovchi «Toshtransdispetcherxizmat» UK vakilining e`tiroziga e`tibor bermay, qo`pol tarzda ayol kishini haqorat qilib, uning qo`lidan mobil telefonini tortib olmoqchi bo`lgan. Buni eplay olmagach, unga qo`l ko`targan. Ushbu fakt bo`yicha Toshkent shahar IIBB tomonidan chora ko`rildi.
Huquqbuzar Zangiota tumanida yashovchi 26 yoshli Hikmatulla M. ismli fuqaro ekanligi aniqlandi. Haydovchi qo`lga olinib, unga nisbatan O`zbekiston Respublikasi Ma`muriy javobgarlik to`g`risidagi kodeksining 1286 moddasi («Transport vositalari haydovchilarining to`xtash yoki to`xtab turish qoidalarini buzishi») hamda haydovchilik guvohnomasi taloni yo`qligi bois O`zbekiston Respublikasi Ma`muriy javobgarlik to`g`risidagi kodeksining 135 moddasi (Yo`l harakati qoidalarida nazarda tutilgan hujjatlari bo`lmagan shaxslarning transport vositalarini boshqarish) asosida bayonnomalar tuzildi.
Bundan tashqari, «Toshtransdispetcherxizmat» UK rahbariyatining arizasiga asosan Shayxontoxur tumani ma`muriy ishlar bo`yicha sudi tomonidan Hikmatulla M. O`zbekiston Respublikasi Ma`muriy javobgarlik to`g`risidagi kodeksining 183 moddasida (Mayda bezorilik) nazarda tutilgan huquqbuzarlik amalga oshirganlikda aybdor deb topilib, unga nisbatan 5 sutka muddatiga ma`muriy qamoq ko`rinishidagi jazo tayinlandi.
Izoh: ushbu moddada jamoat joylarida uyatli so`zlar bilan so`kinish, fuqarolarga haqoratomuz shilqimlik qilish hamda jamoat tartibini va fuqarolarning osoyishtaligini buzuvchi shu kabi boshqa hatti-harakatlarda ifodalangan jamiyatda yurish-turish qoidalarini qasddan mensimaslik nazarda tutilgan. 183-modda sanksiyasida eng kam ish haqining uchdan besh baravargacha yoki 15 sutka muddatigacha ma`muriy qamoq jazosi qo`llanilishi ko`zda tutilgan.
