Shu kunlarda O`zbekiston milliy kutubxonasi delegasiyasi AQShda bo`lib, bir qancha yirik kutubxona muassasalari faoliyati bilan tanishmoqda. Bu haqda O`zA xabar berdi.
Keyingi yillarda O`zbekiston hamda Amerika Qo`shma Shtatlari o`rtasida madaniy-gumanitar sohasidagi aloqalar ham yangi bosqichga chiqmoqda. Alisher Navoiy nomidagi O`zbekiston milliy kutubxonasi va AQShning O`zbekistondagi elchixonasi o`rtasida imzolangan memorandum asosida mamlakatimiz kutubxonachilari shu kunlarda AQShda axborot-kutubxona faoliyatidagi ilg`or tajribalarni o`rganmoqda.
AQSh Davlat departamenti har yili dunyo bo`ylab 5 mingga yaqin mutaxassislarni “Etakchilar uchun xalqaro mehmonlar dasturi” asosida tajriba almashish va malaka oshirishga taklif etadi. Kutubxonachilarimiz Vashington, Portlend, Ayova, Buffalo shaharlaridagi davlat va jamoatchilik kutubxonalari, oliy ta`lim muassasalarida kutubxonachilar tayyorlaydigan fakultetlar, arxiv, muzey kabi muassasalar ish faoliyati bilan tanishmoqda.
AQSh Milliy kutubxonasi, ya`ni, Kongress kutubxonasining Afrika va Yaqin Sharq bo`limida mamlakatimizga oid ko`plab nodir manbalar saqlanadi. Buyuk ajdodlarimizning durdona asarlari Kongress kutubxonasining boyligi hisoblanadi. Jumladan, Burhoniddin Marg`inoniy, Ahmad Farg`oniy, Alisher Navoiy, Ibn Sino kabi bobolarimizning g`arb tamaddunida o`ziga xos o`rin tutgan asarlari mavjud.
– Joriy yilda Ahmad Farg`oniy nomidagi Farg`ona viloyat axborot-kutubxona markazi tashkil etilganiga 120 yil to`ladi, –deydi mazkur axborot-kutubxona direktori Shohidbek Aslonov. – Bugungi kunda ushbu sanaga jiddiy hozirlik ko`rmoqdamiz. Shu bois Ahmad Farg`oniyning turli mamlakatlardagi asarlarini jamlashga alohida e`tibor qaratilmoqda. XIX asrgacha astronomiya ilmida asosiy darslik sifatida o`tilgan “Samoviy jismlar harakati va umumiy ilmi nujum” kitobining 1493 yilda lotin tilida chop etilgan nusxasining elektron ko`rinishi Farg`ona viloyat axborot kutubxona markaziga taqdim etildi.
Shuningdek, xuddi shu kitobning 1669 yilda arab va lotin tilida chop etilgan va bugungi kunda kitobning asl nusxasi Ayova shtati universitetining kutubxonachilik ishlari va axborot texnologiyalari fakultetida saqlanib kelinayotir. Mazkur kitobni ham elektron ko`rinishga o`tkazib, Farg`ona kutubxonasiga taqdim qilish bo`yicha kelishuvga erishildi.
