Davlat bojxona xizmati organlari tomonidan tilla va zargarlik buyumlarini bojxona chegaralari orqali noqonuniy ravishda olib chiqilishiga qarshi qaratilgan chora-tadbirlar muntazam davom ettirilmoqda.
Toshkent viloyati bojxona boshqarmasining “G`ishtko`prik” chegara-bojxona postida qo`shni davlatga chiqib ketayotgan fuqaro S.M.ning bezovtalanishi bojxonachilarda bejiz shubha uyg`otmagan ekan.
Ushbu shaxs xolislar ishtirokida ko`zdan kechirilganida, bo`yniga va qo`llariga taqib olgan holda 4 turdagi tilla taqinchoqlarni yashirincha olib chiqmoqchi bo`lganligi fosh bo`ldi. 295 gr. og`irlikdagi mazkur zargarlik buyumlarining umumiy qiymati 118 mln. so`mni tashkil qilar ekan.
Ayni shu kuni yana bir fuqaro M.M ham 3 turdagi zargarlik buyumlarini bojxona nazoratidan yashirincha olib chiqish uchun yuqoridagi kabi “usul”ni qo`llab ko`rdi. Ammo, bu “usul” unga ham naf bermadi. Natijada, qiymati 85,6 mln. so`mlik 214 gr. og`irlikdagi zargarlik buyumlarini olib chiqish unga “nasib” qilmadi.
Hozirda yuqoridagi holatlar yuzasidan bojxona tekshiruvlari davom ettirilmoqda.