O`zbekiston Respublikasi Prezidentining sog`liqni saqlash sohasida xususiy sektorni rivojlantirishga oid qarorlari natijasida joylarda zamonaviy tibbiy muassasalar ishga tushirilmoqda. Namangan shahridagi “ANAMED” xususiy diagnostika markazi ana shunday sub`ektlardan biridir.
Shavkat Mirziyoev Namangan viloyatiga tashrifi chog`ida ushbu diagnostika markazi faoliyati bilan tanishdi. Bu haqda O`zbekiston Respublikasi Prezidentining Matbuot xizmati xabar berdi.
Neyrojarrohlik, nevrologiya, kardiologiya, urologiyaga ixtisoslashtirilgan ushbu markaz “General Electric”, “Siemens” va boshqa kompaniyalarning ilg`or diagnostika uskunalari bilan jihozlangan. Malakali kadrlar jamoasi shakllantirilgan. Bu borada Buyuk Britaniya, Yaponiya, Rossiyadagi etakchi diagnostika markazlari bilan hamkorlik o`rnatilgan. Bir guruh shifokorlar ushbu mamlakatlarda malaka oshirib qaytgan. Hindiston va Rossiyadan tajribali shifokorlar ishga jalb etilgan.
Hozir bu erda o`ttizdan ortiq kishi ishlaydi. Shu oyda stasionar va fizioterapiya bo`limlari foydalanishga topshirilishi bilan yana ellikdan ziyod yangi ish joyi yaratiladi.
Davlatimiz rahbari kasalliklarni davolagandan ko`ra, ularning oldini olish zarurligini, to`g`ri tashxis qo`yish va kasalliklarni erta aniqlash uchun bunday diagnostika markazlari muhimligini ta`kidladi.
