Xalq deputatlari Toshkent shahar kengashi qaror orqali poytaxt brendini (logotip) tasdiqladi, deb yozadi Toshkent shahar hokimligi matbuot xizmati.
Toshkent shahar hokimligi hamda hokimlik qoshidagi Jamoatchilik kengashi tomonidan o`tkazilgan tanlov natijasiga ko`ra, shaharning ochiq turgan oltin darvozalari va moviy osmoni bilan birgalikda «T» harfini ifodalagan ramz eng maqbul deb topildi.
Yangi logotipdan O`zbekiston va xorijda o`tkaziladigan turistik ko`rgazma hamda savdo yarmarkalarida, turistik ob`ektlarda, xarita, bosma va elektron nashrlarda; sayyohlar uchun mo`ljallangan esdalik sovg`alari, libos boshqa mahsulotlarda, shuningdek Toshkent shahri turizmiga bag`ishlangan reklama, videorolik, ko`rsatuvlarda foydalanish mumkin.
Poytaxt brendini ishlab chiqish bo`yicha tanlov o`tgan yili kuzda e`lon qilingan bo`lib, unga tayyorgarlik ishlari iyulda boshlangan. Tanlov hay`ati a`zolari tarkibida Jamoatchilik kengashi vakillari, marketing, brending, dizayn sohasida O`zbekiston, Rossiya, Evropa hamda Osiyo mamlakatlarida etuk tajribaga ega bo`lgan mutaxassislar faoliyat olib bordi.
Loyiha maqsadiga binoan, poytaxtga investisiyalarni jalb etishni oshirish, Markaziy Osiyodagi hududlar o`rtasida hayot kechirish, investisiya va turizm uchun eng qulay bo`lgan mintaqa sifatidagi Toshkentning ijobiy qiyofasi belgilab olindi. Bir necha oy mobaynida ishlab chiqilgan brend «Toshkent — umumiy uyimiz» g`oyasiga asoslangan.
Logotip bosh g`oyasi tamoyillarida ochiq darvozalar tasviri orqali shaharning mehmondo`stligi hamda bag`rikengligi, shuningdek moviy osmon tasviri ramzi vositasida esa faravon va osoyishta hayot mohiyati singdirilgan. Belgining asosiy jihati shundaki, uni turli holatga moslashtirib qo`yish, mavzu jihatdan bezak, tasvir va shaklga moslashtirish mumkin. Bu esa, uni shaharning turli joyi hamda tadbirlari – jamoat joylari, muzeylar, xizmat ko`rsatish muassasalari, transport, ko`rgazma, madaniyat tadbirlarida o`rnatish imkoniyatini beradi.
«Toshkentga kelgan sayyohlar uning mehmondo`stligi hamda barcha uchun ochiqligini ushbu ko`rinish orqali tasavvur qilishadi. Shahardan qaytayotganda esa ularda har doim sevimli poytaxtning darvozalari barcha uchun doim ochiq bo`lishi to`g`risida, qiziqarli jihatlari bilan iliq taassurot qoldiradigan yorqin xotiralar qoladi», — deb tavsiflanadi brend.
Toshkent shahar hokimligi qoshidagi Jamoatchilik kengashi shahar brendi to`g`risida unga qiziqqan shaxs va jurnalistlar uchun taqdimot o`tkazishni rejalashtirgan. Tadbirda olib borilgan ushbu jarayon haqida ma`lumot beriladi. Shahar brendining taqdimoti videosi va infografikasining to`liq taqdimoti uni yuklab olish uchun saytga qo`yiladi.
