Bojxona organlari tomonidan sifati kafolatlanmagan dori vositalarini yurtimizga noqonuniy olib kirilishiga qarshi samarali kurash olib borilmoqda.
Xususan, Namangan viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo`limi xodimlari viloyat Davlat xavfsizligi xizmati vakillari bilan hamkorlikda tezkor tadbir o`tkazishdi. Bu haqda Davlat bojxona qo`mitasi axborot xizmati xabar bermoqda
Tadbir davomida, fuqaro M.A boshqaruvidagi “Kobalt” rusumli avtomashina to`xtatilib, belgilangan tartibda xolislar ishtirokida ko`zdan kechirildi. Natijada, avtomashinada 31 turdagi 162 million so`mlik dori vositalari borligi aniqlandi.
Shundan so`ng, tezkor tadbir davom ettirilib, fuqaro M.O boshqaruvidagi “Lasetti” avtomashinasi ham belgilangan tartibda nazoratdan o`tkazildi. Tekshiruv jarayonida avtomashinada 141 million so`mlik 20 turdagi dori vositalari borligi ma`lum bo`ldi.
O`tkazilgan tezkor tadbir davomida umumiy qiymati 303 million so`mdan ortiq bo`lgan dori vositalari ashyoviy dalil sifatida olindi.
Hozirda mazkur holatlar yuzasidan bojxona tekshiruvlari davom ettirilmoqda.
