Bir muddat avval Respublikamizdagi 10 ta OTM xalqaro e`tirof etilgan tashkilotlar reytingidan joy olgani haqida xabar bergan edik.
Bugun esa xalqaro reytingda tan olingan OTMlarimiz bilan batafsil tanishishingiz mumkin.
Xorijiy ekspertlar tomonidan respublikaning 10 ta oliy ta`lim muassasasi (O`zMU, TIQXMMI, TDTU, TATU, SamDU, TDAU, UrDU, TTA, Turin politexnika universiteti, QQDU) tanlab olindi va ularning Times Higher Education va QS bazasida tegishli profillari yaratildi. Ekspertlar shu 10 ta oliy ta`lim muassasasi bilan yaqindan ishlamoqda. Xususan:
*Toshkent irrigasiya va qishloq xo`jaligini mexanizasiyalash muhandislari instituti mustaqil O`zbekiston tarixida birinchi marotaba 2020 yil uchun QSning Sharqiy Evropa va Markaziy Osiyo davlatlari universitetlari reytingida qayd etildi.
Bu Oliy va o`rta maxsus ta`lim vazirligining Respublika oliy ta`lim muassasalarini xalqaro nufuzini oshirish maqsadida Times Higher Education va QS kabi dunyoning etakchi xalqaro agentliklari bilan so`nggi ikki yil ichida olib borgan hamkorligi natijasidir.
*Toshkent irrigasiya va qishloq xo`jaligini mexanizasiyalash muhandislari instituti QS reytingida akademik so`rovnoma, ish beruvchilarning bahosi va ilmiy salohiyati kabi mezonlarda Sharqiy Evropa va Markaziy Osiyo davlatlari universitetlari o`rtasida ijobiy ko`rsatkichlarni qayd etib, 301-350 o`rinlar oralig`idagi universitetlar qatoridan joy oldi.
(Ma`lumot uchun: QS reyting agentligi tomonidan ilmiy tadqiqotlarga 20%, akademik so`rovnomaga (jahon OTMlariga o`rganilayotgan universitet yuzasidan so`rovnoma yuborish, jahon OTMlari uchun tanilishda ilmiy tadqiqot ishlarining roli yuqori) 30%, ish beruvchilar so`rovnomasiga 20%, o`quv jarayoniga 15%, boshqalarga 15% ajratilgan.)
Ushbu reytingda 1-o`rinni Lomonosov nomidagi Moskva davlat universiteti, 2-o`rinni Sankt-Peterburg davlat universitetlari egalladi. Reytingda Rossiya, Chexiya, Turkiya, Vengriya, Polsha, Ruminiya, Sloveniya, Xorvatiya, Belarus, Bolgariya kabi davlatlarning etakchi universitetlari joy oldi.
Hozirda vazirlik tomonidan xalqaro ekspertlar bilan birgalikda respublikamizning etakchi oliy ta`lim muassasalarini bosqichma-bosqich xalqaro reytingga kiritishga tayyorlash bo`yicha ishlar olib borilayotganligi ma`lum qilindi.
