Namangan shahrida 1995 yilda tug`ilgan, kasbi qassob bo`lgan Olimxon ismli yigit ikki yarim million so`m qarz olgan tanishi Muhsinovni pichoqlab, unga og`ir tan jarohati etkazdi. Bu haqda «Sevimli» telekanalining «Zamon» informasion dasturida ma`lum qilindi.
Ushbu jinoyat ishi Jinoyat ishlari bo`yicha viloyat sudida ko`rib chiqildi. Guvohlar ko`rsatmalari, daliliy ashyolar o`rganildi.
O`sha kuni Olimxon tanishi Muhsinovni «Bunyodkor» MFY hududidagi «Yoshlik baraka» bozori hududida uchratib, undan qarzini qaytarishni so`raydi. Biroq o`rtada janjal kelib chiqadi. Atrofdagi odamlar ikkalasini ajratib, Muhsinovni bozordan chiqarib yuboradi. Shunda Olimxon Muhsinovning orqasidan yugurib borib, unga yonidagi oshxona pichog`i bilan tashlanadi hamda Muhsinovga o`ta og`ir jarohat etkazadi.
Holat huquq-tartibot tizimi xodimlari tomonidan o`rganilib, "samosud"ga qo`l urgan jinoyatchiga nisbatan hukm o`qildi.