Bojxona organlari tomonidan tovar moddiy boyliklarining noqonuniy aylanmasiga qarshi tizimli ravishda kurash olib borilmoqda.
Jumladan, Jizzax viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo`limi xodimlari huquqni muhofaza qiluvchi boshqa idora vakillari bilan hamkorlikda tezkor tadbir o`tkazdi.
Tezkor tadbir davomida kuzatuvga olingan fuqarolar J.A., S.O. hamda M.Sh.lar to`xtatilib, ularning yuklari belgilangan tartibda ko`zdan kechirildi.
Natijada, ushbu shaxslarga tegishli bo`lgan sumkalarda umumiy qiymati 51 million so`mlik 600 dona shampun va 2402 dona gigienik dezodarantlar borligi aniqlandi.
Shuningdek, tadbir davomida yana bir qonunbuzarning qing`ir qilmishi fosh etildi.
Do`stlik tumanida harakatlanib ketayotgan, tezkor kuzatuvga olingan “Isuzi” rusumli yuk avtoulovi to`xtatilib belgilangan tartibda xolislar ishtirokida nazoratdan o`tkazildi.
Natijada, avtomashina yukxonasida fuqaro B.N.ga tegishli bo`lgan, hech qanday hujjatlari bo`lmagan, xorijda ishlab chiqarilgan, umumiy qiymati 62,3 million so`mlik 49 dona televizorlar borligi aniqlandi.
Hozirda mazkur holatlar yuzasidan bojxona organlari tomonidan surishtiruv ishlari olib borilmoqda
