O`zbekiston Respublikasi Adliya vazirligi huzuridagi Davlat xizmatlari agentligi tadbirkorlik sub`ektlarini ro`yxatga olish bo`yicha yagona vakolatli organ hisoblanadi.
Agentlik tashkil etilganligining 2 yilligi arafasida Jahon banki tomondan e`lon qilingan “Biznes yuritish–2020” yillik hisobot natijalari agentlik uchun chinakam tuhfa bo`ldi.
Davlat xizmatlari agentligi tomonidan aholiga ko`rsatilayotgan xizmat samaradorligi tahlili natijasida mamlakatimiz yillik hisobotning “Biznesni ro`yxatdan o`tkazish” ko`rsatgichi bo`yicha 12-o`rindan 8-o`ringa ko`tarildi. Ya`ni, O`zbekiston tarixda birinchi marotaba ushbu sohadagi eng ilg`or 10 talik davlatlar ro`yxatiga kiritildi.
Albatta, erishilgan yutuq tizimdagi kelgusi istiqbolli harakatlar uchun turtki bo`ladi.
Xatolarimizni anglash uchun mamlakatmiz soha mutaxassislari tomonidan “Biznesni ro`yxatdan o`tkazish“ ko`rsatkichi bo`yicha etakchi o`rinlarni egallagan Yangi Zelandiya, Gruziya, Kanada, Singapur kabi mamlakatlar tajribasini tahlil qilindi.
Tahlil natijalarida O`zbekistonda biznesni boshlash jarayonini takomillashtirish uchun bir necha muhim va yuksak innovasiyalarni joriy etish zarurligi qayd etildi.
Shu jumladan:
– davlat ro`yxatidan o`tkazish jarayoni bilan bir vaqtning o`zida QQS to`lovchisi sifatida ixtiyoriy ro`yxatdan o`tish tartibini belgilash;
– imzolar namunalarini tayyorlash jarayonini soddalashtiradigan tartibni ishlab chiqish;
– biznes boshlash istagida bo`lgan tashkilotning xodimlar shtati shakllantirilgan bo`lsa, tadbirkorlik sub`ektini ro`yxatdan o`tkazish jarayoni bilan bir vaqtda xodimlarning Pensiya jamg`armasida ro`yxatdan o`tishi imkonini yaratish;
– ro`yxatdan o`tish jarayonining o`zida elektron ariza berish va tayyorligi to`g`risida onlayn xabarnoma yuborish orqali, muhr va shtamplarni tayyorlash uchun onlayn ravishda ariza berish imkonini yaratish;
– mobil ilova orqali biznesni ro`yxatdan o`tkazish imkoniyatini yaratish.
