Ўзбекистон Республикаси Адлия вазирлиги ҳузуридаги Давлат хизматлари агентлиги тадбиркорлик субъектларини рўйхатга олиш бўйича ягона ваколатли орган ҳисобланади.
Агентлик ташкил этилганлигининг 2 йиллиги арафасида Жаҳон банки томондан эълон қилинган “Бизнес юритиш–2020” йиллик ҳисобот натижалари агентлик учун чинакам туҳфа бўлди.
Давлат хизматлари агентлиги томонидан аҳолига кўрсатилаётган хизмат самарадорлиги таҳлили натижасида мамлакатимиз йиллик ҳисоботнинг “Бизнесни рўйхатдан ўтказиш” кўрсатгичи бўйича 12-ўриндан 8-ўринга кўтарилди. Яъни, Ўзбекистон тарихда биринчи маротаба ушбу соҳадаги энг илғор 10 талик давлатлар рўйхатига киритилди.
Албатта, эришилган ютуқ тизимдаги келгуси истиқболли ҳаракатлар учун туртки бўлади.
Хатоларимизни англаш учун мамлакатмиз соҳа мутахассислари томонидан “Бизнесни рўйхатдан ўтказиш“ кўрсаткичи бўйича етакчи ўринларни эгаллаган Янги Зеландия, Грузия, Канада, Сингапур каби мамлакатлар тажрибасини таҳлил қилинди.
Таҳлил натижаларида Ўзбекистонда бизнесни бошлаш жараёнини такомиллаштириш учун бир неча муҳим ва юксак инновацияларни жорий этиш зарурлиги қайд этилди.
Шу жумладан:
– давлат рўйхатидан ўтказиш жараёни билан бир вақтнинг ўзида ҚҚС тўловчиси сифатида ихтиёрий рўйхатдан ўтиш тартибини белгилаш;
– имзолар намуналарини тайёрлаш жараёнини соддалаштирадиган тартибни ишлаб чиқиш;
– бизнес бошлаш истагида бўлган ташкилотнинг ходимлар штати шакллантирилган бўлса, тадбиркорлик субъектини рўйхатдан ўтказиш жараёни билан бир вақтда ходимларнинг Пенсия жамғармасида рўйхатдан ўтиши имконини яратиш;
– рўйхатдан ўтиш жараёнининг ўзида электрон ариза бериш ва тайёрлиги тўғрисида онлайн хабарнома юбориш орқали, муҳр ва штампларни тайёрлаш учун онлайн равишда ариза бериш имконини яратиш;
– мобил илова орқали бизнесни рўйхатдан ўтказиш имкониятини яратиш.
