Viloyat paxtakorlari tomonidan joriy yilda 63 ming 406 gektar maydonda paxta etishtirildi. Har gektar erdan 30 sentnerdan hosildorlikka erishilib, el-yurt xirmoniga 192 ming 500 tonna yuqori sifatli sanoat xom ashyosi topshirildi.
Zafar marrasini egallashda qishloq xo`jaligida izchil davom ettirilayotgan islohotlar, paxtachilikni yanada rivojlantirishga ilmiy-innovasion yondashuv, jumladan, viloyatda sohaga zamonaviy klaster usulining keng joriy etilishi muhim ahamiyatga ega bo`ldi.
“Namangan momiq sochiqlari”, “Toshbuloqteks”, “Uztex Uckurgan”, “Namangan to`qimachi” klasterlari viloyatning to`qqiz tumanidagi mavjud 1 ming 584 ta fermer xo`jaligi bilan shartnoma asosida ish olib bordi. Ular tomonidan fermerlarga mehnatga haq to`lash, yonilg`i-moylash materiallari, mineral o`g`it hamda o`simlik zararkunandalariga qarshi biologik kurash vositalarini etkazib berilishi bilan bog`liq shartlarning to`liq bajarilishi mehnat samaradorligini ta`minlashda muhim omil bo`ldi.
“Namangan momiq sochiqlari” mas`uliyati cheklangan jamiyati tomonidan 239 ta fermer xo`jaligi bilan klaster usulida ish tashkil qilingan Mingbuloq tumanida viloyatda birinchi bo`lib g`alaba marrasi egallandi.
Ayni paytda viloyatning beshta tumani – Kosonsoy, To`raqo`rg`on, Uychi, Norin va Uchqo`rg`on tumanlarida hosilni yig`ishtirib olish ishlari davom etmoqda.
