Saida Mirziyoeva tanqididan so`ng Qarshidagi “Jurnalistlar uyi”ning qurilish ishlari yana jonlandi (foto)

Bir muddat avval, ijtimoiy tarmoqlarda Qashqadaryo viloyati “Jurnalistlar uyi” binosining achinarli ahvolga kelib qolganligi haqida xabar e`lon qilingan.

Axborot va ommaviy kommunikasiyalar agentligi direktori o`rinbosari Saida Mirziyoeva ushbu holat tez orada bartaraf etilishiga umid bildirgandi. 

Shundan so`ng, Qashqadaryo viloyat hokimligi axborot xizmati ushbu ma`lumotni viloyat hokimi vazifasini bajaruvchi Zoir Mirzaevga etkazgan. Mazkur o`rinli tanqididan so`ng Zoyir Mirzaev viloyat tashkilotlari rahbarlariga muammoga e`tibor qaratib, ta`mirlash ishlarini yakuniga etkazish topshirig`ini berdi. 

Shunga ko`ra, 23 noyabr kuni Jurnalistlar uyida ommaviy hashar tashkil etildi va qurilish ishlari yana jonlandi. Bu haqda darakchi.uz'ga Qashqadaryo viloyati hokimligi Matbuot xizmati rahbari ma`lum qildi.

Keltirilishicha, binoning issiqlik va elektr tizimidagi muammolarini bartaraf etish ishlari boshlangan. Quvurlar ta`mirlanayapti. Batareylar keltirildi. Shuningdek binoning orqa tomonidagi deraza romlari ham almashtiriladi.
 

Ushbu binoda amalga oshirilgan bunyodkorlik ishlari va erishilgan natija, bir so`z bilan aytganda "Jurnalistlar uyi"ning yangi qiyofasi haqida keyinchalik yana xabar qilamiz.