Surxondaryo viloyati tarkibida Bandixon tumani tashkil etiladi. Ushbu masalani deputatlar Oliy Majlis Qonunchilik palatasining navbatdagi majlisida ko`rib chiqishdi.
Shningdek deputatlar Qiziriq, Boysun va Qumqo`rg`on tumanlari hududlari chegarasini o`zgartirish to`g`risidagi masalani ham ko`rib chiqdilar.
O`zgarishlarga ko`ra, Surxondaryo viloyati Qiziriq tumani hududidagi “Bandixon”, “Bektepa”, “Obod turmush”, “Polvontosh”, “Saroy”, “Birdamlik”, “Chinor”, “Paxtakor”, “Navbahor”, “Farovon”, “Bahoriston”, “O`rg`ilsoy”, “Gulbog`”, “Qaldirg`och”, “Zevar”, “Xo`jaipok”, “Obod yurt” hamda “Bag`ri keng” mahalla fuqarolar yig`inlari, Boysun tumanining “Ko`lqamish” mahallasi “Kuba” qishlog`i, “Obikor” hamda Quduqsoy mahalla fuqarolar yig`inlari, Qumqo`rg`on tumanidagi “Davlatsoy” mahallasining “Porloq” va “Xurmazor” qishloqlari, “Navruz” hamda “Bandixon” mahalla fuqarolar yig`ini hududlari tashkil etilayotgan Bandixon tumani tarkibiga o`tkaziladi.
Deputatlarning aytishicha, bu o`zgarishlar hududda qishloq xo`jaligi, ayniqsa, chorvachilikni rivojlantirishga, aholi bandligini ta`minlashga, Surxondaryo viloyatining dehqonchilik mintaqasi hisoblangan Bandixon tumanini ijtimoiy-iqtisodiy jihatdan yanada taraqqiy ettirishga ijobiy ta`sir ko`rsatadi.
