Yangi yil yaqinlashgan sayin kun tartibiga chiqadigan pirotexnika vositalarining noqonuniy muomalasi mavzusi tobora dolzarb tus olayotgani bejiz emas. Ijtimoiy tarmoqlarda allaqachon pirotexnikadan foydalanishning ayanchli oqibatlari aks etgan videolar ham tarqalib ulgurmoqda.
Osoyishtalik, yong`in xavfsizligi va eng avvalo salomatlikka jiddiy xavf tug`diradigan bu turdagi vositalarning zarari va oqibatlari haqida davlat bojxona xizmati organlari tomonidan ham keng miqyosdagi tushuntirish-targ`ibot ishlari amalga oshirilmoqda.
Xususan, umumta`lim maktablarida o`tkazilayotgan uchrashuvlarda o`quvchi yoshlarni bu zararli odatdan qaytarish yangi yilni oila davrasida xursandchilikda qarshi olishda muhim ekanligi ta`kidlanmoqda.
Ana shunday tadbirlarning navbatdagisi Davlat bojxona qo`mitasi Axborot xizmati va Bojxona instituti bilan hamkorlikda poytaxtimizning Shayhontohur tumanidagi 254-umumta`lim maktabida bo`lib o`tdi.
O`quvchilar bilan samimiy muloqot shaklida kechgan tadbirda pirotexnika vositalaridan o`zboshimchalik bilan foydalanish qanday salbiy oqibatlarga olib kelishi hayotiy misollar bilan tushuntirib berildi.
O`quvchilar e`tiboriga ayni shu mavzuda tayyorlangan turli ijtimoiy videoroliklar namoyish etildi. Pirotexnika vositalarini noqonuniy ravishda olib o`tish chog`ida fosh qilingan shaxslar haqida ma`lumotlar berildi.
Ha, bu kabi manzaralarni kuzatar ekanmiz, pirotexnika vositalalarining noqonuniy muomalasiga qarshi kurashda nafaqat huquqni muhofaza qiluvchi idoralar xodimlari balki faol fuqarolik pozisiyasiga ega shaxs sifatida har birimiz bunday holatlarga qarshi turmog`imiz shart.
Zero, gap osoyishtaligimiz, xavfsizligimiz va eng avvalo, farzandlarimiz – ertamiz egalarining salomatligi haqida ketar ekan, loqayd bo`lishga hech birimizning haqqimiz yo`q.
Davlat Bojxona qo`mitasi Matbuot xizmati
