«Boshqa nominantlarga ensam qotdi». «Markaziy studiya» boshlovchilari “Oltin kabutar” marosimidagi janjalga oydinlik kiritdi (video)

«Xalqlar do`stligi» san`at saroyida televidenie, kino, san`at va madaniyat sohasi vakillari uchun «Yoshlar» va «Mening yurtim» telekanallari tomonidan tashkil etilgan «Oltin kabutar—2019» taqdimoti bo`lib o`tdi. Unda “Markaziy studiya” boshlovchilari tomonidan sahnada kutilmagan holat yuz berdi. 

Ya`ni? taqdimotda «Markaziy studiya» ko`rsatuvining boshlovchisi Sarvar Bahodirovning sahnaga chiqib, «Aslida eng yaxshi ko`rsatuv nominasiyasida g`oliblikni «Yo`lovchi» ko`rsatuvi olsa ham biz xafa bo`lmas edik. Chunki din targ`iboti yo`lida xizmat qilayotganlarni har qancha olqishlasak arziydi. Lekin shuni ham aytmoqchimizki, bugun «Markaziy studiya» xalq oldiga chiqib, ommani oldida qo`rqmasdan haqiqatni gapirib kelyapti. «Xalqlar do`stligi» saroyi sahnasidan turib, «Markaziy studiya» uchun achinmaymiz, faqat xursand bo`lamiz. Lekin do`stim Amirxon Umarovga achinmadim, boshqa nominantlarga ensam qotdi, to`g`risi, balki bu joyi ketmas efirga, balki bu sahnaga bizni boshqa taklif etishmas, lekin tashkilotchilikdagi juda katta kamchiliklarni sezib o`t iribmiz», degan so`zlari katta shov-shuvlarga sabab bo`ldi.

Shundan so`ng «Markaziy studiya» ko`rsatuvi boshlovchilari “IntervyuTV” orqali Feruz Muhammadga intervyu berib, ushbu gap-so`zlarga sabab bo`lgan holatlarni gapirib berishdi. 

“O`sha kungi “Oltin kabutar” dagi kelishmovlar “repitisiya” jarayonida boshlandi. Biz bir necha kun oldin yig`ildik. Ko`pchilik intervyulari bilan taniydigan odam o`zini rejissyorligini ma`lum qildilar. O`sha joyni o`zida muloqat juda qo`pol tarzda boshlandi. ‘Men rejissyorman, sizlarga yordam bermoqchiman, mening aytganimni qilinglar’ mazmunida gapirdilar. ‘Nima uchun bu erga kelganlaringizni bilasizlarmi?’, deganlarida men ‘Biz sizni hozir biroz tushunmayapmiz’ dedim. Chunki biz u odamni intervyulari bilan ko`proq taniymiz. Shundan keyin menga qarshi bir-ikkita gaplar bo`ldi. Keyin ba`zi hamkasblarimiz bilan kelishmovchiliklar bo`ldi. So`ngra Amirxonga ‘Oltin kabutar’ni tomoshabinlar qatorida tomosha qilaylik dedim. Baribir nomzodlar orasida bizning nomzod ham bor ekan. Boshlovchilik qilmay qo`ya qolaylik, bizdan kattalar boshlovchilik qila qolsin dedik. Fiklarimiz ma`qullandi, tadbirni yoshi kattalar olib borishadigan bo`lishdi.

Birinchi ‘repitisiya’dagi vaziyatdan kelib chiqib, sahnadagi rejissyorlik ishlariga qarshi chiqmoqchi emasdim. Jarayonni tomoshabinlar qatorida kuzatib o`tirdik, sahnadagi rejissyorlik ishlaridan yonimdagi san`at vakillari ham bir-birlariga qarab qo`yishdi. Yilning eng yaxshilarini taqdirlayotganlarida ‘biz bularning me`zoni qanday bo`lganini, nima uchun bular eng yaxshilari bo`lganini’ o`yladik. Nima asosida ular eng yaxshi deb tanlab olindi?! Boshlovchilarning monitor bilan ishlashida rejissyor tomonidan kamchiliklar bo`ldi. Sahnada tashkilotchilik deb gapirib yubordim, lekin aslida rejissyor tomonidan kamchiliklarni nazarda tutgan edim.

Ko`rganlar, kuzatganlar biladi, boshlovchilar orasida tanaffuslar, bir-birini to`ldirib ketolmaslik hollari kuzatildi. 4000 kishilik zalga jon kirgiza olish bu boshlovchining vazifasidir. Boshlovchiga rejissyor topshiriq beradi, ammo boshlovchini o`zi ham bu vazifani bajara olish kerak. Keyin ayrim nominasiya g`oliblarini biz tanimadik. Bizning hamkasbimiz bo`lsa ham tanimaslik, kuzatmaslik balki bizning aybimizdir. Lekin rostan ham ‘Eng yaxshi telejurnalist’ hamda ‘Eng yaxshi teleboshlovchi`ni men taniganim yo`q.

To`g`ri, SMS orqali ularga ovoz berildi. Bu tomoni shaffof bo`lgandir deb o`ylayapman-u, lekin ichini bilmayman. Menda shunaqa tushuncha borki, shaxsiyatdagi kamchilikni o`zini chetga tortib aytish kerak. Lekin uning ishiga nisbatan kamchilikni baralla aytsa bo`ladi. Ertaga u holni takrorlamasligi uchun. Shu bilan qo`limga mikrofon tegib qoldi va o`sh gaplarni gapirdim. Abdulla Qahhorning bir gapi bor: ‘Qo`rqsang gapirma, gapirsang qo`rqma!’. Biz gapirish bosqichidan o`tib bo`lgan edik. Qo`rqish-qo`rqmaslik bosqichida turgan edik. Ikkinchisiga amal qildik. ‘Gapirsang qo`rqma’. Nima bo`lsa bo`ldi, Allohga tavakkal. Keyin parda ortida muloqotlar bo`ldi. Mana shu media sohasi ichida yurganlar bizga tosh otishdi. Eng ko`p tosh otganlari ular bo`ldi. Lekin tomoshabin sifatida u erda bizni ko`pchilik qo`llaganini olqishlardan ham sezish mumkin.

Blogerlarning fikriga umuman qiziqqanim yo`q. Ayrim telekanallarda ishlaydigan media sohasini ichida aylanib yurganlarning fikriga ham qiziqqanim yo`q. Birinchi eng yaqin do`stimdan ‘U erda qo`pol gapirganmidim?’ deb so`radim. Uning fikri shunday bo`ldi: ‘Hammasi yaxshi, ko`nglingni xotirjam qilsang bo`ladi. Menimcha, ochiqcha aytganing har tomonlama ma`qul’. Keyin ota-onam bilan maslahatlashaman. Boshqa mayda-chuyda gap-so`zlar umuman qiziqtirmaydi . Gapga aralashib yursangiz, rivojlana olmaysiz. ‘Ensam qotdi’ joyini biroz qo`pol gapirib qo`yibsan, o`sha joyda sal o`zingni bilmay qolganing bilindi. Keyingi safar bu xatoni qilmagin’, deyishdi. Keyin bu xatoyimni tan oldim. Lekin ijtimoiy tarmoqdagilarga rasmiy munosabat ham bildirganim yo`q. Bizda eng kuchli qurol efir. Efir davomida bir-ikkita ilmoqli gaplarni gapirdim.

Sarvar Bahodirov, «Markaziy studiya» ko`rsatuvi bosh muharriri va boshlovchisi

«Markaziy studiya»ning yana bir boshlovchisi Amirxon Umarov ushbu vaziyatni quyidagicha izohladi:

"Ochig`ini aytsam, ‘Eng yaxshi telejurnalist’ nominasiyasida men g`olib bo`lmasligimni ko`nglim sezayotgan edi. Lekin men xursand bo`lgan taraf shundaki, konsertni ko`rgan bo`lsangiz, g`olibni e`lon qilishga chiqqan shifokor Amirxon Umarov deganida zalning qiyqirig`ini eshitgan bo`lsangiz kerak. To`gri, adashib ketdi, lekin o`sha shovqin va qarsaklardan juda xursand bo`ldim. Lekin ikkita boshlovchi bu erda anglashilmovchilik bo`ldi deb yanglishganini aytishdi. Men uchinchi o`rinda ekanman.  O`sha paytda nahotki dedim... Chunki birinchi va ikkinchi turlarda ovozlar bo`yicha birinchilikda kelayotgan edim. Uchinchi va to`rtinchi turda telefon orqali SMS yozishda pastki o`ringa tushib ketibman. Undan keyin o`sha gapni aytishga majbur bo`ldim.

O`sha ikkita hamkasbimni to`g`risi tanimayman. Qaysi ko`rsatuvni olib borishlarini o`sha kuni bildim. ‘Davr’ ko`rsatuvida boshlovchi ekan. Lekin tanimas edim. Shuning uchun ham to`g`risini aytdim, o`sha hamkasblarimga qaraganda men kamroq ishlabman. Ko`proq ijod qilishga, ko`proq o`z ustimda ishlashga harakat qilaman degan ma`noda gapirdim. Lekin oxirida hamkasbim Sarvarning fikrlaridan keyin men ham ruhlanib ketdim. Juda to`g`ri fikrlar bo`ldi. Emosiyaga berildik, lekin u erda yolg`on, to`qima gaplar bo`lgani yo`q."

Ma`lumot uchun, «Oltin kabutar—2019»da «Eng yaxshi telejurnalist»  nominasiyasida 1-o`rin Miraziz Mirzaahmedov «Yoshlar» telekanali, 2-o`rin Dilfuza Ismoilova «Yoshlar» telekanali, 3-o`rin esa Amirxon Umarov «Mening yurtim» telekanali boshlovchisiga nasib etgan edi.