Avval xabar berganimizdek, O`zbekiston Respublikasi Oliy sudi, AQSh Xalqaro taraqqiyot agentligi (USAID) va BMT Taraqqiyot dasturining “O`zbekistonda qonun ustuvorligi yo`lida hamkorlik” qo`shma loyihasi doirasida mahalliy va xorijiy OAVlari ishtirokida press—tur o`tkazildi...
Press—tur safaridagi so`nggi manzil esa Buxoro viloyati bo`ldi. Buxoro viloyatidagi galdagi tashrifimiz Buxoro viloyat Romitan tumanlararo iqtisodiy sudi va fuqarolik ishlari bo`yicha Romitan tumanlararo sudi faoliyati bilan tanishdik. Press—tur ishtirokchilarini Buxoro viloyat iqtisodiy sudi raisi Maqsud Saidov, Buxoro viloyat Romitan tumanlararo iqtisodiy sudi raisi Aziz Safarov, fuqarolik ishlari bo`yicha Romitan tumanlararo sudi raisi Azamat Ikromov, sudya Doniyorbek Eshchanov va devonxona mudiri Aziz Sharipov qarshi olishdi.
Fuqarolik ishlari bo`yicha Romitan tumanlararo sudining ma`muriy binosida fuqarolik sudi va Romitan tumanlararo iqtisodiy sudlari faoliyat ko`rsatib kelmoqda.
Doniyorbek Eshchanov, fuqarolik ishlari bo`yicha Romitan tumanlararo sudi sudyasi: — Binoda 2 ta sud zali va 1 ta videokonferensaloqa zali mavjud.
Shuningdek, sud binosida jami 5 nafar sudya xonasi, 5 nafar sudya yordamchilari xonasi hamda sud arxivi va devonxona bor.
Fuqarolik ishlari bo`yicha Romitan tumanlararo sudi 4 tarkibli, ya`ni 1 nafar sud raisi va 3 nafar sudyalardan iborat.
Aziz Safarov, Buxoro viloyat Romitan tumanlararo iqtisodiy sudi raisi: — Romitan tumanlararo iqtisodiy sudi esa 1 tarkibli. Ya`ni, 1 nafar sud raisidan iborat.
Maqsud Saidov, Buxoro viloyat iqtisodiy sudi raisi: — Hozirda tumanlararo sudiga Jondor va Romitan tumanlari biriktirilgan bo`lib, ushbu tumanlarda fuqarolik ishlari bo`yicha Romitan tumanlararo sudi va Romitan tumanlararo iqtisodiy sudi tomonidan fuqarolik va iqtisodiy ishlar ko`rib chiqiladi. Romitan tumanida aholi soni 140 ming kishini tashkil etadi. Shuningdek, Jondor tumanida ham aholi soni 173,2 ming kishini tashkil etadi.
FIB Romitan tumanlararo sudining ma`muriy binosining kirish qismida sudyalar tomonidan fuqarolarni qabul qilish jadvallari hamda fuqarolar uchun da`vo ariza yoki yozishlari uchun namuna doskalari o`rnatilgan.
Shuningdek, viloyat sudi va Oliy sud raxbarlarining qabul kunlari jadvali ham mavjud.
Fuqaroning sudga kirishidan to ishini hal qilib chiqishigacha barcha jarayon qadamba qadam ko`rsatib qo`yilgan. Fuqaro o`zining holatidagi da`vo toifasini tanlab, hal qiluv qarorini ko`rishi mumkin. O`ziga kerakli hujjatlardan nusxa olish imkoniyatlari ham bor.
— Fuqarolar tomonidan sudyaning faoliyatiga baho berish uchun tashkil qilingan maxsus qutini ko`rdim. 1 yil davomida maxsus qutichalar sudyalar ishidagi qaysi kamchiliklarni fosh qildi?
Doniyorbek Eshchanov, fuqarolik ishlari bo`yicha Romitan tumanlararo sudi sudyasi: — Fuqarolar sudyalarning xatti-harakatlari yuzasidan bemalol o`z firk-mulohazalari, shikoyat va takliflarini maxsus qutiga tashlashlari mumkin. Mazkur quti 1 oyda 1 marotaba Sudyalar oliy kengashi vakili va Xalq qabulxonasi mudiri ishtirokida ochiladi. Lekin shu vaqtga qadar shikoyat tushgani yo`q, aksincha tashakkurnomalar bor.
Azamat Ikromov, fuqarolik ishlari bo`yicha Romitan tumanlararo sudi raisi: — Sudda fuqarolar uchun qulaylik yaratish uchun boshqa tumanlararo sudlari orqali konferensaloqa dasturi orqali onlayn rejimida fuqarolik ishlarini ko`rish imkoniyatlari mavjud. Shuningdek, FIB Romitan tumanlararo sudida milliy elektron tizimi mavjud. Ushbu dastur fuqarolarga o`zlari tomonidan kiritgan da`vo arizalari E—SUD yuzasidan chiqarilgan hal qiluv qarorlarini to`g`ridan to`g`ri internet tarmog`i orqali ko`rishlari mumkin. Fuqarolar tomonidan E—SUD tizimi orqali fuqarolik va iqtisodiy sudlariga elektron shaklda da`vo arizalar kiritish imkoniyatlari mavjud.
Xususan, sudda qonuniy kuchga kirgan sud qarorlarini ijroga qaratish ham elektron tizim orqali amalga oshirib kelinyapti.
Sadoqat ALLABERGANOVA,
Buxoro viloyati Romitan tumani
