Poytaxtda 4 bolali Tursunoyni farzandlari bilan ko`chaga haydashdi. Uning turmush o`rtog`i vafot etganidan so`ng xonadonda propiskasi bo`lmagani uchun qaynisi va qaynonasi tomonidan ozgina pul berib, uydan chiqarib yuborildi. Boquvchisini yo`qotgan oila dastlab do`konning omborida qo`nim topdi. Keyin qo`lidagi ozroq pulga uy-joy qurilishini boshlamoqchi bo`lishdi. Aksiga olib, g`isht terib uyning devorini tiklagan ustalar ayoldan kerakli pulni ololmay ketib qoldi, tomiga beton qo`yib beraman, deguvchilar esa hatto uyning tomini yopmasdan pulni olib qochib qolishdi.
Bir necha kun sovuqda tomi ochiq uyda istiqomat qilgan to`rt nafar bola va ularning onasi yordam so`rab muruvvatli insonlarga murojaat qilmoqda. Ayol hozirda qurilishi tugamagan xonadonda yashashning iloji bo`lmagani bois ijara uyda har oy 200 AQSh dollari to`lab yashab kelmoqda. Bu pulni ham saxovatli insonlar ko`magida to`lamoqda. Ona bolalar tezroq uylarining tomini yopib, ko`chib chiqishni xohlashyapti. Ayolning katta o`g`li 8 yoshda. U o`zlariga yordam bergan barcha insonlarga katta bo`lganida yaxshiligini qaytarishga va`da berdi. Video:
