Ijtimoiy tarmoqlarda F.Normurodova marhum nabirasining jasadi eksgumasiya qilinmasdan o`limiga sababchi bo`lgan shaxslar himoya qilinayotganligi mazmunida murojaat e`lon qilgan. Ushbu holat Qashqadaryo viloyat prokuraturasi tomonidan o`rganildi. Bu haqda “darakchi.uz”ga Bosh prokuratura Matbuot xizmati ma`lum qildi.
Aniqlanishicha, Koson tumani, “Shaboda” ko`chasida yashovchi G.Qayumovaning 2019 yil 14 oktyabrda tug`ilgan farzandi A.Qaxxorovning 2019 yilning 16 oktyabr kuni vafot etganligi holati yuzasidan 02.12.2019 yilda Koson tumani prokuraturasi tomonidan JKning 116-moddasi 3-qismi bilan jinoyat ishi qo`zg`atilib, tergov harakatlari olib borilmoqda.
Jinoyat ishi yuzasidan marhumning o`limi sababini aniqlash maqsadida sud-tibbiy ekspertizasi tayinlanib, 04.12.2019 yilda murdani eksgumasiya qilish to`g`risida jinoyat ishlari bo`yicha Koson tumani sudi ajrimi chiqarilgan.
Koson tumani prokuraturasi tomonidan eksgumasiya qilish to`g`risidagi sud ajrimining ijrosini ta`minlashga F.Normurodova qarshiligini bildirganligi sababli, bu haqda 04.12.2019 yilda bayonnoma rasmiylashtirilgan.
Tibbiyot xodimlarining aybdorlik masalasini marhumning o`limi sababini aniqlamasdan turib hal etish imkoniyati bo`lmaganligi sababli murdani eksgumasiya qilish 2020 yilning 17 yanvar kuniga belgilangan.
Shu kuni, tezkor-tergov guruhi va ekspertlar ishtirokida qabristonga borilganda F.Normurodova murdani eksgumasiya qilishga faol qarshilik ko`rsatgan va bu holat tegishli tartibda videotasvirga olingan.
F.Normurodova murdani eksgumasiya qilishga qarshilik ko`rsatib, sud ajrimini ijro etishga o`zi tomonidan to`sqinlik ko`rsatilganligiga qaramasdan, internet tarmoqlarida organ xodimlari nabirasining jasadini eksgumasiya qilmasdan nabirasining o`limiga sababchi bo`lgan shaxslarni himoya qilishayotgani haqidagi noto`g`ri ma`lumotlarni tarqatgan.
Hozirda jinoyat ishi yuzasidan tergov harakatlari viloyat prokuraturasi tomonidan olib borilmoqda.
Tergov harakatlari natijasiga ko`ra qonuniy qaror qabul qilinishi ta`minlanadi.