Toshkent davlat sharqshunoslik institutining 5 nafar doktorant va magistrlari Koreya fondining umumiy 14 100 AQSh dollari miqdoridagi xalqaro grantni qo`lga kiritishdi. Bu haqda Oliy ta`lim vazirligi Axborot xizmati xabar berdi.
G`oliblarga maxsus sertifikatlarni Koreya Respublikasining mamlakatimizdagi Favqulodda va muxtor elchisi Kan Chje Kvon Toshkentdagi elchixonada o`tkazilgan tadbirda tantanali topshirdi.
Koreya fondining moliyaviy grantiga institutning quyidagi magistr va doktorantlari olib borayotgan ilmiy izlanishlari uchun sazovor bo`lishdi:
- Sirojiddin Maxatov, tayanch doktorant, “Innovasion rivojlanishning xorij tajribasidan O`zbekiston iqtisodiyotida foydalanish imkoniyatlari”;
- Dilorom Ashirbaeva, mustaqil izlanuvchi, “Koreys va o`zbek diskursida murojaat birliklarining qiyosiy tadqiqi”;
- Rasul Sherov, magistr, “Globallashuv sharoitida Janubiy Koreya iqtisodiy rivojlanish transformasiyasi”;
- Maftuna Bahromova, magistr, “Sinxron tarjima sohasining taraqqiyot bosqichlari”;
- Aziza Hidoyatova, magistr, “Yang Kvija hikoyalarida obrazlar tizimi” .
