Prezidentimiz Sh.M.Mirziyoev rahbarligida 2019 yil 27 dekabr kuni yoshlarga oid davlat siyosati sohasidagi ishlar natijadorligi va yoshlar bilan ishlash samaradorligini oshirish borasidagi dolzarb vazifalar yuzasidan videoselektor tarzida o`tkazilgan uchrashuvda yoshlar bilan ishlash borasida muhim vazifalar belgilab berildi.
Har bir sektor rahbari tomonidan kamida 200 nafar yoshlarni yig`ib uchrashuvlar o`tkazish, qabullarni aholi zich yashaydigan joylarda tashkil etish, yoshlar etakchilarini o`z qanotiga olib, tajribasini oshirish, xalq bilan muloqotga o`rgatish vazifasi ham kun tartibiga qo`yildi.
Viloyatimizda kelajagimiz vorislarining huquqlari, erkinliklari va qonuniy manfaatlarini ro`yobga chiqarish, himoya qilish va kafolatlash borasida aniq manzilli ishlar amalga oshirilmoqda.
Ochiq muloqotlarda, yuzma-yuz suhbatlarda yoshlarning ish bilan bandligi, uy-joy ta`minoti, bo`sh vaqtlarini mazmunli o`tkazish, ta`lim olishga va kasb o`rganishga bo`lgan talablarini qanoatlantirish choralari ko`rilmoqda.
Uchrashuvlarni viloyatning eng olis va chegara hududlarida, birinchi navbatda uyushmagan yoshlar ishtirokida tashkil etishga alohida e`tibor qaratilmoqda.
Joriy yilning 29 yanvar kuni Andijon viloyati, Paxtaobod tumanida viloyat hokimi, viloyat prokurori va sektor rahbarlari ishtirokida yoshlar bilan uchrashuv tashkil qilindi.
O`tkazilgan uchrashuvda Paxtaobod tumanidagi 38.812 nafar yoshlarning 2.868 nafari (shundan, ayollar 1.297 nafar) doimiy mehnat faoliyati bilan band emasligi ma`lum bo`ldi.
Mazkur uyushmagan yoshlar bilan suhbatlar davomida ularning 79 nafari to`qimachilik sanoati yo`nalishida, 134 nafari qurilish va 300 nafari qishloq xo`jaligi sohasida faoliyat yuritish istagini bildirdilar.
Eng muhim jihat – tumandagi 1 ming 59 nafar yoshlar tadbirkorlik faoliyatini boshlash niyatida ekanligi ma`lum bo`ldi. O`ziga ma`qul kasb-hunarni, aytaylik, nonvoy, sartarosh, kosib, chilangar va boshqa yo`nalishlarni egallamoqchiligini salkam 1 ming 296 nafar yoshlar bildirdilar.
Bu raqamlar zamirida el-yurt ishiga kamarbastalik, xonadonlar daromadini, oila byudjetini mustahkamlashdek xayrli niyatlar yotganligini sezish qiyin emas. Demak, muammolarni hal etish o`z-o`zidan islohotlar rivojiga ijobiy ta`sir ko`rsatishi amalda isbotini topmoqda.
Shu jihatdan, uchrashuvda hududdagi yoshlar o`zlarini qiziqtirgan masalalar, hududda ular uchun yaratilgan shart-sharoitlar va yoshlar tashabbuslarini ro`yobga chiqarish uchun mavjud imkoniyatlar haqida viloyat rahbarlari va soha vakillari bilan o`tkazilgan ochiq muloqot asosida ma`lumotga ega bo`ldilar.
Tashkil etilgan uchrashuv davomida unda ishtirok etgan yoshlar tumandagi “Konteks”, “Dinar tekstil” va “Madaniyat tekstil” trikotaj mahsulotlari ishlab chiqaruvchi korxonalari faoliyati bilan yaqindan tanishtirildi. Shu korxonada ishlash istagini bildirgan 56 nafar yosh jamoada mehnat faoliyatini boshlaydigan bo`ldi.
Shuningdek, tadbirda 5 nafar yoshlarga tadbirkorlik faoliyatini yo`lga qo`yish uchun er maydoni ajratilishi va 47 nafar yoshlarga imtiyozli kredit mablag`lari ajratilishi belgilandi.
Shu o`rinda Paxtaobod tumanidagi “Bo`stonobod” MFYda bo`lgan muloqot chog`ida ajoyib bir taklif qo`llab-quvvatlanganligini aytish joiz.
Muloqot davomida D.Mamarasulov boshchiligida 14 nafar uyushmagan yoshlarning qurilish-ta`mirlash ishlarini amalga oshiruvchi jamiyat tashkil qilish tashabbusi qo`llab-quvvatlanib, uchrashuv davomida “Bo`stonobod yoshlar bunyodkori” ma`suliyati cheklangan jamiyati tashkil qilindi.
Shuningdek, uchrashuv ishtirokchilari hududdagi askarlarning va xizmatchilarning faoliyati, o`quv-dala mashg`ulotlari, harbiy texnikalar bilan tanishtirildilar, ko`rgazmali chiqishlar namoyish etildi. Qalbida Vatan himoyachisi bo`lishdek sharafli kasbni egallashni maqsad qilgan yoshlar safi ko`paydi.
Bundan tashqari, hududdagi “Bo`ston” bolalar oromgohida yoshlar ishtirokida futbol, tennis, kurash va shaxmat sport turlari bo`yicha musobaqalar tashkil etildi. Mazkur jarayonga yoshlar ittifoqi etakchilari, milliy va olimpiya sport turlari bo`yicha O`zbekiston, Osiyo va jahon chempionlari taklif qilinganligi yoshlarda havas ruhini uyg`otdi.
Bir so`z bilan aytganda, yoshlarni qo`llab-quvvatlash va ijtimoiy-iqtisodiy faolligini oshirish ustuvor vazifamiz shiori ostida o`tkazilgan uchrashuvda yoshlar o`zlarini qiynab kelayotgan ko`plab masalalarga echim topdilar.
Muhtaram Prezidentimizning Oliy Majlisga Murojaatnomasida shunday fikr ilgari surildi: “Jamiyatda tinchlik va osoyishtalikni ta`minlashda hech kim chetda turmasligi, “O`z bolangizni, o`z uyingizni, o`z Vataningizni ko`z qorachig`idek asrang!” degan shior odamlarimiz qalbidan chuqur joy olishi kerak”.
2020 yilda yoshlarga oid davlat siyosatida tub burilish yasash bo`yicha ulkan maqsadlar belgilab olindi. Xususan, yoshlarni har tomonlama qo`llab-quvvatlash, ularni ish bilan ta`minlash, zamonaviy bilim va kasb-hunarlarni egallashi uchun sharoit yaratish, qobiliyat va iste`dodini ro`yobga chiqarish, ularning muammolari bilan muntazam ravishda shug`ullanish, xususan, qiz bolalarni mustaqil hayotga tayyorlash, madaniyat va san`at sohasini rivojlantirish bilan bog`liq vazifalar ijrosini nazorat qilib borish – sektor rahbari sifatida zimmamizga juda katta mas`uliyat yuklamoqda.
G`ayrat FOZILOV,
Andijon viloyati prokurori,
adliya katta maslahatchisi.
