Bugun, 30 yanvar – O`zbekiston Respublikasining Birinchi Prezidenti Islom Karimov tavallud kuni.
Prezident Shavkat Mirziyoevning 2017 yil 25 yanvardagi “O`zbekiston Respublikasining Birinchi Prezidenti Islom Abdug`anievich Karimovning xotirasini abadiylashtirish to`g`risida”gi qaroriga muvofiq, Birinchi Prezidentimiz tavallud topgan sana har yili munosib nishonlanmoqda. Turli ma`naviy-ma`rifiy tadbirlar, xotira kechalari o`tkazilmoqda.
Islom Karimov mustaqil O`zbekiston davlatining asoschisi, buyuk davlat va siyosat arbobi sifatida xalqimiz qalbidan chuqur joy olgan elimizning suyukli farzandi edi. U o`zining serqirra siyosiy faoliyati, olijanob insoniy fazilatlari bilan Vatanimiz tarixida o`chmas iz qoldirdi.
Islom Karimov tug`ilib o`sgan va ayni paytda mangu orom topgan Samarqand shahrida ham xalqimizning buyuk farzandi tug`ilgan kuni keng nishonlanib, u yod etilmoqda.
Bugun erta tongda Samarqand viloyati hokimi E.Turdimov va jamoatchilik vakillari shahardagi Islom Karimov maqbara-majmuasini ziyorat qildi. Qur`on tilovat qilindi.
Shundan so`ng Registon maydoni yaqinida o`rnatilgan Islom Karimov haykali poyiga gullar qo`yildi.
Viloyatdagi ta`lim muassasalari, muzeylar va boshqa muassasalarda O`zbekiston Respublikasining Birinchi Prezidentining hayoti va serqirra faoliyatiga bag`ishlangan davra suhbatlari, ilmiy-amaliy anjumanlar o`tkazilmoqda.
Avvalroq, O`zbekiston Respublikasining Birinchi Prezidenti Islom Karimovning qizi Lola Karimova-Tillaeva otasini tavallud kunida xotirlagan edi.
