O`zbekiston Respublikasi Qurolli Kuchlari akademiyasiga general-mayor Fidoy Xuseyn Malik boshchiligidagi Pokiston Islom Respublikasi harbiy delegasiyasi tashrif buyurdi, deya xabar berdi Mudofaa vazirligi Axborot va ommaviy kommunikasiyalar departamenti.
Akademiya bo`ylab ekskursiya davomida mehmonlar kursantlarning o`qish jarayoni, kursantlar uchun yaratilgan shart-sharoitlar bilan tanishdilar va akademiya muzeyini ko`rdilar. Delegasiya a`zolarida akademiyaning axborot-resurs markazi va Pokiston Islom Respublikasi Mudofaa vazirligiga bag`ishlab tashkil etilgan maxsus o`quv sinfi alohida qiziqish uyg`otdi.
Tashrif davomida harbiy delegasiya vakillari akademiya professor- o`qituvchilari tarkibi ishtirokida «Davlatlar va Qurolli Kuchlar axborot xavfsizligi» mavzusida seminar mashg`ulot o`tkazdilar.
Tashrif doirasida ikki davlat o`rtasida harbiy va boshqa sohalarda mustahkam hamkorlik masalalari ham muhokama qilindi.
