Shahrisabz tumanidagi 19-maktabgacha ta`lim tashkiloti binosiga kirib borar ekansiz, "Buyuk ajdodlarimizga loyiq voris bo`laylik" degan shiorga ko`zingiz tushadi. Buyuklarga munosib bo`lishni istaganlar etarlicha sharoitni ham yaratishi kerak-da, degan o`y o`tadi xayolingizdan, deya bog`cha deyishga arzimaydigan sharoitga fotosayohat qildi qashqadaryogz.uz.
Kiraverishda oyoq kiyimlari to`zg`ib yotibdi (sovuqda turgan shu poyabzallarni bolalar qaytishda yana kiyib ketishiyam bor), daraxtga ilingan va eskirgan uslubdagi "umivalnik"larga shu izg`irinda yoshi kattalar qo`l uzatishga jur`at qilolmaydi, bolalarni-ku qo`yavering.
Gaz plitasi ballonlarga ulangan, biroq u xavfsizlik qoidalariga to`la javob beradi, deb bo`lmaydi.
Umuman, ushbu bog`chadagi har bir holat, manzara kishi ko`nglini xunob etishga yaraydi, xolos.
Endi o`ylab ko`ring: sohadagi islohotlar sharoitida shunday bog`chalarga o`rin bo`lishi mumkinmi?
To`g`ri, sovuq mavsumda issiq muhit yaratishning o`zi bo`lmaydi. Bu borada qiyinchiliklar etarlicha topiladi, lekin shunday bo`lishi oldindan ma`lum edi-ku. Tadorikni ham shunga qarab ko`rish kerak emasmidi? Qiyin-qiyin, bog`cha degani shunday bo`larkan, deya, televizorda ko`rsatiladigan bog`chalarga havas bilan termiladigan beg`ubor tasavvurdagi qorako`zlarga qiyin…
Bir so`z bilan aytganda, mavjud sharoit eng rivojlangan davrda shu ahvolda tarbiyalanayotgan bolajonlarga achinib, yig`lashga arziydi, xolos. Biz ham mas`ullardan og`ir masalaga ijobiy echim kutib qolamiz.
