Bugungi pandemiya sharoitida ayrim do`kon, savdo maskanlari yopiqligidan foydalanib qolishga intilganlar ham borligi afsuslanarli, albatta. 10 apreldan 8 may kunigacha bo`lgan vaqt oralig`ida Toshkent shahrining Mirobod tumanida noma`lum shaxs Farg`ona yo`li 4-tor ko`chasida joylashgan “Sheyx” nomli savdo do`koniga kalit tanlash yo`li bilan kirib, u erdan umumiy qiymati 11.735.000 so`mlik “Samsung” televizori, 3 dona ayollar sumkasi, kompyuter xotirasi, 22 dona erkaklar atiri va kiyim-kechaklarni o`g`irlab ketgan. Bu haqda IIV Axborot xizmati xabar bermoqda.
Ma`lum bo`lishicha, mazkur do`kon Surxondaryo viloyati, Sariosiyo tumanilik, vaqtincha Mirobod tumani, Farg`ona yo`li 4-tor ko`chasidagi uyda yashovchi J.Sh.ga tegishli ekan. Ko`rilgan choralar natijasida ushbu jinoyatni Mirobod tumani Farg`ona yo`li ko`chasida yashovchi A.O. sodir etganligi aniqlanib, ushlangan.
Mazkur holat yuzasidan O`zbekiston Respublikasi JKning 169-moddasi 2-qismi bilan jinoyat ishi qo`zg`atilgan. Tergovni IIB olib bormoqda.
