Бугунги пандемия шароитида айрим дўкон, савдо масканлари ёпиқлигидан фойдаланиб қолишга интилганлар ҳам борлиги афсусланарли, албатта. 10 апрелдан 8 май кунигача бўлган вақт оралиғида Тошкент шаҳрининг Миробод туманида номаълум шахс Фарғона йўли 4-тор кўчасида жойлашган “Шейх” номли савдо дўконига калит танлаш йўли билан кириб, у ердан умумий қиймати 11.735.000 сўмлик “Самсунг” телевизори, 3 дона аёллар сумкаси, компьютер хотираси, 22 дона эркаклар атири ва кийим-кечакларни ўғирлаб кетган. Бу ҳақда ИИВ Ахборот хизмати хабар бермоқда.
Маълум бўлишича, мазкур дўкон Сурхондарё вилояти, Сариосиё туманилик, вақтинча Миробод тумани, Фарғона йўли 4-тор кўчасидаги уйда яшовчи Ж.Ш.га тегишли экан. Кўрилган чоралар натижасида ушбу жиноятни Миробод тумани Фарғона йўли кўчасида яшовчи А.О. содир этганлиги аниқланиб, ушланган.
Мазкур ҳолат юзасидан Ўзбекистон Республикаси ЖКнинг 169-моддаси 2-қисми билан жиноят иши қўзғатилган. Терговни ИИБ олиб бормоқда.
