Bugun Olmaliq kon-metallurgiya kombinati rahbariyati hamda kombinat xodimlari kasaba uyushmasi Kengashi taklifiga ko`ra, kombinatning har bir ishchi-xodimiga oylik maoshi hisobidan arzon narxda, 8200 so`mlik 1 donadan tovuq tarqatilayotgani haqida xabar berildi. Xabarga fotosuratlar ham ilova qilingandi. Unda aks etgan holat, ya`ni tovuqlarning achinarli ahvoli ko`pchilikda savol va kinoyalar uyg`otdi: Bu tovuqlarning nega pati uzuq-yuluq, atayin yulib tashlanganmi? Kasal tovuqlar emasmi?
Biroz o`tib, mazkur savollarga OKMK Axborot xizmati quyidagicha javob berdi:
Iste`mol mollari ishlab chiqarish boshqarmasining Parrandachilik fermasi veterinari Anvar Haydarovning ma`lum qilishicha, fermada boqilgan “Lomann sendi” zotli tovuqlari faqat tuxum qo`yishga mo`ljallangan bo`lib, jo`ja paytidan 120 kunlik bo`lganidan so`ng, tuxumga kiradi va to`xtovsiz 580 kun davomida tuxum qo`yishadi. Germaniyaning mashhur tuxum qo`yishga mo`ljallangan bu tovuq zoti mahsuldorligi bilan ajralib turadi. Parrandachilik fermasidagi tovuqlarning tuxum qo`yish muddati o`tab bo`linganligi sababli hamda iqtisodiy samaradorligi kamayganligi bois, ushbu tovuqlarni sotish kerak bo`lgan. Bu masalada tadbirkorlar kombinat rahbariyatiga tovuqlarni sotib olish taklifi bilan chiqqan. Ammo tovuqlar kombinat ishchilariga ijtimoiy himoya yordami sifatida, beg`araz tarqatilishga qaror qilingan.
Veterinarning ta`kidlashicha, ushbu tovuqlar har oyda turli xil kasalliklarga qarshi muntazam ravishda emlanib turilgan. Va 29 xil ozuqani o`z ichiga olgan rasion bilan oziqlantirilgan. Shuningdek, tovuqlarning sog`lomligi haqidagi tegishli tashkilotlar tomonidan berilgan sertifikat hujjatlari ham mavjud.
Ayni paytda bu parrandalarning tullash mavsumi bo`lganligi sababli tovuqlarning patlari to`kilgan. Ammo go`shti iste`molga yaroqli va hech qanday shubhaga o`rin yo`q.
Qayd etilishicha, kombinat ishchilari uchun berilayotgan ushbu tovuqlarni olish ixtiyoriy.