Бугун Олмалиқ кон-металлургия комбинати раҳбарияти ҳамда комбинат ходимлари касаба уюшмаси Кенгаши таклифига кўра, комбинатнинг ҳар бир ишчи-ходимига ойлик маоши ҳисобидан арзон нархда, 8200 сўмлик 1 донадан товуқ тарқатилаётгани ҳақида хабар берилди. Хабарга фотосуратлар ҳам илова қилинганди. Унда акс этган ҳолат, яъни товуқларнинг ачинарли аҳволи кўпчиликда савол ва киноялар уйғотди: Бу товуқларнинг нега пати узуқ-юлуқ, атайин юлиб ташланганми? Касал товуқлар эмасми?
Бироз ўтиб, мазкур саволларга ОКМК Ахборот хизмати қуйидагича жавоб берди:
Истеъмол моллари ишлаб чиқариш бошқармасининг Паррандачилик фермаси ветеринари Анвар Ҳайдаровнинг маълум қилишича, фермада боқилган “Ломанн сенди” зотли товуқлари фақат тухум қўйишга мўлжалланган бўлиб, жўжа пайтидан 120 кунлик бўлганидан сўнг, тухумга киради ва тўхтовсиз 580 кун давомида тухум қўйишади. Германиянинг машҳур тухум қўйишга мўлжалланган бу товуқ зоти маҳсулдорлиги билан ажралиб туради. Паррандачилик фермасидаги товуқларнинг тухум қўйиш муддати ўтаб бўлинганлиги сабабли ҳамда иқтисодий самарадорлиги камайганлиги боис, ушбу товуқларни сотиш керак бўлган. Бу масалада тадбиркорлар комбинат раҳбариятига товуқларни сотиб олиш таклифи билан чиққан. Аммо товуқлар комбинат ишчиларига ижтимоий ҳимоя ёрдами сифатида, беғараз тарқатилишга қарор қилинган.
Ветеринарнинг таъкидлашича, ушбу товуқлар ҳар ойда турли хил касалликларга қарши мунтазам равишда эмланиб турилган. Ва 29 хил озуқани ўз ичига олган рацион билан озиқлантирилган. Шунингдек, товуқларнинг соғломлиги ҳақидаги тегишли ташкилотлар томонидан берилган сертификат ҳужжатлари ҳам мавжуд.
Айни пайтда бу паррандаларнинг туллаш мавсуми бўлганлиги сабабли товуқларнинг патлари тўкилган. Аммо гўшти истеъмолга яроқли ва ҳеч қандай шубҳага ўрин йўқ.
Қайд этилишича, комбинат ишчилари учун берилаётган ушбу товуқларни олиш ихтиёрий.
