O‘zbekiston Respublikasi Raqobatni rivojlantirish va iste’molchilar huquqlarini himoya qilish qo‘mitasi Uzum Market MCHJ XK tomonidan bildirilgan rasmiy murojaatni ko‘rib chiqdi.
Murojaatda “YandexGo” UB MCHJ tomonidan ommaviy axborot vositalarida, xususan televideniye va ijtimoiy tarmoqlar orqali e’lon qilingan Yandex Market reklama materiali orqali Uzum Market obro‘siga putur yetkazilishi holatlari qayd etilgan.
Qo‘mitaning tegishli maxsus komissiyasi tomonidan ushbu murojaat yuzasidan o‘rganish ishlari olib borildi hamda natijalarga ko‘ra, “Raqobat to‘g‘risida”gi qonunning 21-moddasi talablari buzilishi alomatlari aniqlanib, YandexGo UB MCHJga nisbatan qonuniy tartibda ish qo‘zg‘atildi.
Mazkur modda doirasida xo‘jalik yurituvchi subyektlarning raqobatbardosh faoliyatiga g‘ov bo‘luvchi bir qator harakatlar, xususan raqobatchilarni obro‘sizlantirish, noto‘g‘ri taqqoslash, iste’molchilarni chalg‘itish, tijorat sirini noqonuniy tarzda egallash va raqobatchilarni bozorga kirishiga sun’iy to‘siqlar qo‘yish kabi holatlar qat’iy taqiqlanadi.
Raqobat qo‘mitasi bu kabi holatlarga nisbatan qat’iy pozitsiyada bo‘lib, tadbirkorlik muhitining sog‘lom va adolatli raqobat tamoyillari asosida shakllanishini ta’minlashga intiladi. Ish doirasida barcha tegishli materiallar chuqur tahlil qilinib, qonuniy baho berilishi ta’minlanadi.
