Buxoro viloyatining Olot tumanida o`zlarini O`zbekiston Respublikasi Prezidenti Administrasiyasi huzuridagi Axborot va ommaviy kommunikasiyalar agentligining vakillari va “Yurt salohiyati” gazetasi muxbirlari deb tanishtirgan shaxslar qo`lga olindi.
Aniqlanishicha, mazkur shaxslar Olot tumanidagi dehqon bozori, savdo do`konlari, kafe va restoranlar faoliyatiga noqonuniy aralashib, karantin qoidalariga rioya qilinishi yuzasidan tekshiruvlar o`tkazib, salbiy maqola chiqarish orqali savdo ob`ektini yoptirish, jarimaga tortish va tashkilot rahbarini ishdan olish bo`yicha taklif kiritish bilan qo`rqitgan.
Tadbirkorlarning tuman IIBga qilgan murojaatidan so`ng ularning shaxsiga oydinlik kiritildi. Ular — 1975 yilda Toshkent viloyatida tug`ilgan X.Sh.Sh, 1976 yilda Toshkent viloyatida tug`ilgan M.U.M. va 1984 yilda Andijon viloyatida tug`ilgan K.E.M. ekanligi aniqlandi.
Tekshiruv davomida ularning yonidan “O`zbekiston Respublikasi Prezidenti administrasiyasi huzuridagi Axborot va ommaviy kommunikasiyalar agentligi” degan soxta yozuv kiritilgan, davlat gerbi va bayrog`i tushirilgan xizmat guvoxnomalari, bozor va savdo do`konlarini tasvirga olgan qo`l telefonlari va boshqa ayrim tegishli xujjatlar xolislar ishtirokida tegishli tartibda hujjatlashtirib olindi. Ayni paytda ushbu shaxslarning harakatlariga qonuniy baho berish maqsadida Olot tuman IIB tomonidan dastlabki tergovga qadar surishtiruv ishlari olib borilmoqda.
Axborot va ommaviy kommunikasiyalar agentligi shuni ma`lum qiladiki, “Yurt salohiyati” gazetasi 2019 yil 19 sentyabrda Agentlikning Samarqand viloyati boshqarmasi tomonidan ommaviy axborot vositasi sifatida davlat ro`yxatidan o`tkazilgan. Muassis — OLTIN ASR SERVIS MChJ. Ushbu nashr va muassis Agentlikka daxldor emas va xizmat guvohnomasida Agentlik nomi soxtalashtirilgan va noqonuniy ravishda kiritilgan.
Mazkur masala yuzasidan Agentlik huquqni muhofaza qiluvchi organlarga tegishli ravishda murojaat qildi va masala tez orada qonuniy echim topadi. Yurtdoshlarimizni esa yanada hushyor va ogoh bo`lishga chorlab qolamiz.
